Выданне The Bell выпусціла расследаванне пра тое, хто вядзе расійскі ваенны тэлеграм-канал «Рыбарь». Гэты канал публікуе самыя падрабязныя зводкі і самыя дакладныя карты баявых дзеянняў, на яго спасылаюцца CNN, Bloomberg і заходнія вайсковыя эксперты. Нярэдка ён з'яўляецца крыніцай і для аглядаў падзей на фронце, якія рыхтуе «Наша Ніва». За час вайны канал набраў 1,1 мільёна падпісчыкаў.
Самі стваральнікі «Рыбаря» ў сакавіку 2020 года сцвярджалі, што іх двое, а сябе апісвалі так:
«Вайсковы перакладчык — спецыяліст па OSINT'y і паліттэхнолаг, прадстаўнік старадаўняй арыстакратыі».
The Bell сцвярджае, што ўстанавіла асобу аднаго з гэтых людзей — «паліттэхнолага, прадстаўніка старадаўняй арыстакратыі». Яго завуць Дзяніс Шчукін — гэта 44-гадовы маскоўскі праграміст. У 2001 годзе ён атрымаў грамадзянства Расіі замест грамадзянства ФРГ у консульскім аддзеле МЗС Расіі ў Кыргызстане.
The Bell звязаўся са Шчукіным праз яго тэлеграм-акаўнт, але на пытанні пра стваральнікаў і аўтараў «Рыбаря» і працу канала ён не адказаў, хоць свайго ўдзелу ў вядзенні канала не адмаўляў: «Я не збіраюся дэананіміраваць супрацоўнікаў, выдаваць нешта, што можна выкарыстоўваць супраць нас… Так што прабачце, але не. Дзякуй за гутарку».
Тэлеграм-канал «Рыбарь» адносіцца да тых расійскіх «патрыятычных» рэсурсаў, які ў прынцыпе падтрымлівае правядзенне «спецаперацыі ва Украіне», але пры гэтым сурова крытыкуе дзеянні расійскага вайсковага камандавання і не хавае нязручных для яго фактаў.
Каментары