Арцыбіскуп Гуджэроці пра Макея: Ён адыграў вырашальную ролю ў дыялогу паміж каталікамі і дзяржавай
26 лістапада арцыбіскуп Клаўдыя Гуджэроці скіраваў з Лондана ліст паслу Беларусі пры Святым Пасадзе, першаму намесніку міністра замежных спраў Сяргею Алейніку, у якім выказаў свае спачуванні з прычыны раптоўнай смерці міністра Уладзіміра Макея, піша catholic.by.
Арцыбіскуп Гуджэроці, які цяпер завяршае сваю місію ў якасці Апостальскага нунцыя ў Вялікабрытаніі, з 2011-га па 2015 год быў прадстаўніком Святога Пасада ў Беларусі. У сваім лісце высокі ватыканскі іерарх, у прыватнасці, піша пра свой досвед супрацоўніцтва са спачылым міністрам Макеем.
«Магу засведчыць, што падчас маёй дзейнасці ў мінулыя гады ў вашай краіне, а таксама пазней, падчас яшчэ адной місіі, даручанай мне Святым Айцом, спадар Макей адыграў вырашальную ролю для дыялогу паміж Святым Пасадам і мясцовымі каталікамі з аднаго боку і беларускімі дзяржаўнымі уладамі з другога. Менавіта дзякуючы пасрэдніцтву спачылага міністра замежных спраў былі таксама рэалізаваныя важныя гуманітарныя ініцыятывы», — напісаў арцыбіскуп Гуджэроці.
Ватыканскі дыпламат таксама адзначыў прафесійныя якасці Уладзіміра Макея і даў высокую ацэнку стылю яго працы на важнай дзяржаўнай пасадзе.
«Я заўсёды знаходзіў у ім жывую гатоўнасць падтрымліваць адкрытымі каналы камунікацыі і весці пошук прымальнага пасрэдніцтва нават тады, калі пазіцыі былі адрознымі. Магу засведчыць і тое, што такі яго падыход з удзячнасцю адзначалі таксама многія іншыя дыпламаты ў самых разнастайных заданнях», — заўважыў іерарх.
У сваім лісце арцыбіскуп Клаўдыя Гуджэроці выказаў глыбокія спачуванні родным, супрацоўнікам і ўсім блізкім асобам Уладзіміра Макея, і запэўніў у сваёй малітве аб супакоі для яго душы.
Побач з Лукашэнкам на хакеі з'явілася новая прыгажуня10
Каментары