«Калі вы хочаце працягу палітыкі, якая была безвыніковай 10 гадоў, гэта ваша права».
Прэзідэнтка Літвы Даля Грыбаўскайтэ цвёрда адказала каардынатару грамадзянскай ініцыятывы «Хартыя-97» Андрэю Саннікаву ў часе міжнароднай канфэрэнцыі ў Рызе.
У часе дыскусіі Саннікаў заявіў, што Грыбаўскайтэ зняважыла беларусаў, запрасіўшы Лукашэнку ў Вільню. Вы пагразлі ў геапалітыцы і забыліся пра каштоўнасці, дакараў ён.
Грыбаўскайтэ адказала ў вельмі цвярдым тоне: «Калі вы хочаце працягу палітыкі, якая была безвыніковай 10 гадоў, гэта ваша права. А я лічу, што трэба даць шанец — не рэжыму, а беларускаму народу, на тое, каб далучыцца да Еўропы».
Прэзідэнт Эстоніі Томас Ільвэс дадаў: ён за безвізавы рэжым з Беларуссю. Ён заўважыў, што сітуацыя з правамі чалавека ў Расіі нашмат горшая, чым у Беларусі, тым не менш з Расіяй ЕС дамаўляецца.
«Беларусь — дыктатура, — дадаў Ільвэс, — але не апошняя дыктатура ў Еўропе».
Штогадовая канферэнцыя ў Рызе сёлета мела за назву «Аднаўленне эканомікі пры зменлівай сітуацыі з бяспекай: трансатлантычны парадак дня — 2010». Яна прайшла 23-24 кастрычніка. У ёй узялі ўдзел кіраўнікі трох балтыйскіх краінаў, міністры замежных справаў шэрагу еўрапейскіх дзяржаваў, высокапастаўленыя ўрадоўцы ЗША.
Незалежнае грамадства Беларусі ў Рызе рэпрэзентавалі, апрача Саннікава, дырэктар Беларускага інстытуту стратэгічных даследаванняў Віталь Сіліцкі, заснавальнік сайту E-Belarus.org Міхал Дарашэвіч, былы пасол Беларусі ў Латвіі і палітвязень Міхал Марыніч, кіраўніца брусэльскага офісу «За дэмакратычную Беларусь» Вольга Стужынская.
Каментары