Гэта адна з высноў грунтоўнага статыстычнага даследавання, якое ў 2022 годзе праводзілася ў арабскіх краінах.
Пуцінскі і лукашэнкаўскі рэжымы на фоне вайны ва Украіне, унутраных палітычных рэпрэсій, эканамічных праблем і санкцыйнага ціску вельмі любяць сябе супакойваць тым, што супраць іх ваюе выключна Захад, які ўяўляе сабой толькі маленькую частку планеты (з самымі высокімі паказчыкамі ВУП і ВПК), а ўся астатняя «сусветная большасць» нібы з вялікай радасцю іх падтрымлівае або, як мінімум, застаецца нейтральнай.
У прыклад яны нярэдка прыводзяць краіны арабскага свету, упэўніваючы, што гэта адны з іх найлепшых сяброў і супраць палітыкі дзвюх краін нічога не маюць. Але ці так гэта на самай справе?
Нядаўна выйшла справаздача Арабскага цэнтра даследаванняў і вывучэння палітыкі (ACRPS) за 2022 год з вялікім масівам статыстычнай інфармацыі, якая прысвечана настроям жыхароў 14 арабскіх краін і іх стаўленню да самых розных тэм: ад пытанняў узроўню жыцця, рэлігіі і сацыяльных сетак да пытанняў дэмакратыі, рэгіянальнай бяспекі і міжнароднай палітыкі.
У апытанні Arab Opinion Index, заснаваным на асабістых інтэрв'ю з удзелам 33 тысяч рэспандэнтаў, таксама абмяркоўвалася стаўленне да Расіі ў кантэксце яе дзейнасці ў свеце і асабліва ў арабскім рэгіёне. Мы прачыталі гэта даследаванне і прыводзім ніжэй кароткую інфармацыю пра тое, што арабскі свет увогуле думае пра расійскую палітыку.
Расія ўваходзіць у топ-5 краін, якія пагражаюць стабільнасці і бяспецы арабскага свету
Паводле апытання, сярод краін, чыя палітыка нясе пагрозу арабскім краінам, самымі небяспечнымі лічацца Ізраіль (84%) і ЗША (78%).
Следам за імі ў якасці галоўных пагроз арабскаму свету ідуць Іран і Расія, прычым абедзве краіны, на думку рэгіянальнай грамадскасці, нясуць аднолькавую небяспеку — за іх прагаласавалі па 57% апытаных рэспандэнтаў.
Таксама ў кантэксце рэгіянальнай палітыкі асобна разглядаецца сітуацыя з Палесцінай.
Меркаванне ўдзельнікаў апытання, разбітае па арабскіх рэгіёнах, паказвае на пераважна негатыўнае стаўленне да палітыкі Расіі ў гэтым пытанні — агулам 58% супраць і толькі 23% за.
Што тычыцца міжнароднага выкліку, а менавіта ваеннага ўварвання Расіі ва Украіну, то сярод апытаных увогуле толькі 19% лічаць падобныя дзеянні апраўданымі ці часткова апраўданымі. А амаль палова (44%) рэспандэнтаў усіх арабскіх краін лічыць гэта недапушчальным і неапраўданым.
Дыяграма 86 паказвае, што ні ў адной з пералічаных арабскіх краін Расія ў гэтым выпадку не мае пераважнай падтрымкі. Адзіная такая-сякая падтрымка ў Расіі ёсць толькі ў Алжыры — 5% (праўда, пры гэтым астатнія 94% зусім не вызначыліся).
У той жа момант у Катары, Кувейце, Тунісе, Іарданіі, Іраку, Маўрытаніі і Егіпце абсалютная большасць рэспандэнтаў выступае супраць расійскай агрэсіі ва Украіне (у гэтых арабскіх краінах супраць вайны выступаюць 50% і вышэй).
Arab Opinion Index 2022 — ужо восьмае па ліку статыстычнае апытанне ў арабскіх краінах. Гэта штогадовае апытанне — найбуйнейшае даследаванне грамадскай думкі ў арабскім свеце пры агульных афіцыйных адхіленнях меркаванняў плюс-мінус 2—3%. З поўнай справаздачай на англійскай мове за 2022 год вы можаце азнаёміцца тут.
Чытайце яшчэ:
Якія санкцыі здольныя прывесці да змены рэжыму? Адказвае прафесар Сонін
Борыс Джонсан назваў памылку Захаду, без якой не было б вайны РФ ва Украіне
Міжнародная федэрацыя журналістаў выключыць Саюз журналістаў Расіі
«Засяроджуся на працы з ЗША». Ціханоўскі расказаў пра свае палітычныя планы на 2026 год32
Каментары