Падчас паездкі ў Беларусь, якую назвалі «сакрэтнай», нямецкі дэпутат сустракаўся з Уладзімірам Макеем
Дэпутат Бундэстага ад «Альтэрнатывы для Германіі» (AfD) Пётр Быстран, які наведаў Беларусь у лістападзе 2022 года, сустракаўся з міністрам замежных спраў Уладзімірам Макеем за тыдзень да яго смерці, а таксама са старшынёй Пастаяннай камісіі Палаты прадстаўнікоў па міжнародных справах Андрэем Савіных.
Пра сваю паездку, якую назвалі «сакрэтнай», ён распавёў выданню Bild.
Быстран вядомы сваімі заявамі супраць паставак зброі Украіне і крытыкай палітыкі Шольца, а таксама Кіева, у прыватнасці, у сувязі з пазбаўленнем Віктара Медзведчука ўкраінскага грамадзянства. Паводле інфармацыі некамерцыйнага даследчага цэнтра Correctiv і літоўскага тэлеканала LRT, для паездкі ў Беларусь ён нібыта выкарыстаў камандзіроўку ў Літву ў лістападзе 2022 года і не згадаў пра яе ў сваёй справаздачы пра паездку кіраўніку Бундэстага.
У матэрыяле Bild гаворыцца, што 9 лістапада 2022 года Быстран зарэгістраваў у Бундэстагу дзелавую паездку ў Літву на перыяд з 13 па 16 лістапада.
«Дакладна і тое, што ён не заявіў пра свой намер паехаць у Беларусь і не даў справаздачу потым перад Бундэстагам. Але яму не давялося гэтага рабіць», — адзначаюць аўтары.
У гэты ж дзень ён таксама абвясціў, што «здзейсніць паездку парламенцкай групы» з 16 па 19 лістапада (заява маецца ў распараджэнні Bild). У якасці пункта прызначэння ён паказаў «Мінск (Беларусь)».
Пра паездку ён праінфармаваў свайго намесніка ў рабочай групе па знешняй палітыцы Ёахіма Вундрака. 11 лістапада яе агульны кошт у 1592 еўра быў падпісаны намеснікам старшыні парламенцкай групы AfD Норбертам Кляйнвехтэрам, а 14 лістапада адказны за фінансы парламенцкай групы Рудыгер Крайзель даў канчатковы дазвол на камандзіроўку.
Адразу пасля дзелавой паездкі ў Літву 16 лістапада Быстран адправіўся ў Беларусь і прабыў там да 19 лістапада, пасля чаго вылецеў назад у Германію — зноў жа з Літвы. Затым ён даў справаздачу пра паездку ў звычайным парадку і прадставіў парламенцкай групе справаздачу пра паездку (маецца ў распараджэнні Bild). У якасці пункта прызначэння ён напісаў «Мінск, Беларусь», у якасці прычыны паездкі — «запрашэнне Мінскага парламента», а ў якасці адной з асноўных тэм — «пабудова міру ва Украіне».
Быстран прызнаўся, што сустракаўся з высокапастаўленымі чыноўнікамі, уключаючы міністра замежных спраў Уладзіміра Макея і старшыню Пастаяннай камісіі Палаты прадстаўнікоў па міжнародных справах Андрэя Савіных. Быстран таксама сустрэўся з кіраўнікамі Беларускага інстытута стратэгічных даследаванняў і Беларускага фонду міру.
Быстран растлумачыў візіт тым, што хацеў вывучыць магчымасць таго, каб Беларусь стала «нейтральным міратворцам для Украіны», і развіваць «двухбаковыя адносіны паміж парламентамі Германіі і Беларусі».
Са сцвярджэннямі, што ён хацеў «схаваць» камандзіроўку ў Беларусь, ён не згодны.
«Correctiv распаўсюджвае тут фэйкавыя навіны, каб дыскрэдытаваць нашы мірныя намаганні. Не выпадкова гісторыя трохмесячнай даўнасці была размешчана толькі цяпер. Гэты штучна створаны «скандал» закліканы зацямніць асвятленне нашага мірнага плана для Украіны», — заявіў палітык.
Першы парламенцкі сакратар СДПГ Каця Маст назвала сітуацыю непрымальнай.
«Паводзіны дэпутата ад AfD непрымальныя. Гэта шкодзіць Германіі ў цэлым. AfD працягвае сваю хлуслівую гульню і тут. Вельмі добра, што цяпер вывучаецца ўсё, што звязана з паездкай у Беларусь. Члены парламента ад AfD становяцца балванамі рэжымаў, якія вядуць вайну ва Украіне, якая супярэчыць міжнароднаму праву, і актыўна падтрымліваюць яе. І парламенцкая група плаціць», — заявіла яна.
«Дык дадому забяры алкаша абасцанага і выходжвай». Малады загадчык аддзялення бальніцы не стрымлівае сябе ў выразах у сацсетках24
Каментары