«Не ведаю, як ён даведаўся пра нас». Мэр Беластока пад асабістую адказнасць дапамог беларусцы ўладкаваць дачку ў спецшколу
Дзіцячая лекарка Мая Церакулава страціла працу ў Беларусі праз сваю грамадзянскую пазіцыю. Яна мусіла з траімі дзецьмі пераехаць у Польшчу, дзе сутыкнулася з шэрагам эмігранцкіх праблем. Уладкаваць дачку ў школу Маі дапамог «прэзідэнт» Беластока, піша «Свабода».
39-гадовая Мая Церакулава выхоўвае траіх дзяцей. У 9-гадовай дачкі Евы — аўтызм. Дзяўчынка патрабуе навучання ў спецыялізаванай школе ці інтэграцыйным класе. Мая расказала «Свабодзе», як шукала месца для адукацыі дачкі і як ёй дапамог мэр (у Польшчы гэтая выбарная пасада называецца «прэзідэнт». — РС) Беластока Тадэвуш Трускаляскі.
«Цуд у тым, што я не знаёмая з прэзідэнтам горада, я не пісала яму, не хадзіла на прыём. Я не ведаю, як ён даведаўся пра нашу праблему, але факт у тым, што ён умяшаўся», — кажа доктарка.
Яна больш за месяц хадзіла па розных школах Беластока, шукала месца для навучання Евы. Усюды атрымала адмову, бо ані ў спецыялізаваных школах, ані ў інтэграцыйных класах не было вольных месцаў. Хадзіла лекарка, паводле яе слоў, і ў дэпартамент адукацыі.
«Хадзіла разам з Евай, бо яе ж няма на каго пакінуць. Такая, ведаеце, жанчына з сумным выглядам, з вельмі дрэннай польскай мовай просіць, каб узялі дачку вучыцца. Але адзінае, чаго мы дабіліся, што Еву маглі ўзяць на вучобу толькі з верасня ў спецыялізаваную школу, бо па заканадаўстве ў такім класе можа быць не больш за пяць вучняў. І там ужо ёсць пяць, толькі што ў верасні іх пакіне хлопчык, і Еву абяцалі ўзяць на ягонае месца», — расказала Мая.
Жанчына хадзіла ў тым ліку і ў школу «па месцы жыхарства». Там таксама не маглі ўзяць дзяўчынку з асаблівасцямі развіцця, бо не маюць адмыслоўцаў і інтэграцыйнага класа.
«Я «азадачыла» дырэктара школы, і ён недзе хадзіў разбірацца. У выніку мне патэлефанавалі з сакратарыята спецыялізаванай школы і паведамілі, што дырэктару школы пазваніў прэзідэнт Беластока і прасіў, каб Еву ўзялі вучыцца цяпер, шостай у клас, пад ягоную персанальную адказнасць. Уявіце, гэта так прыемна і нечакана для нас! Прэзідэнт горада пагадзіўся ўзяць на сябе адказнасць за 9-гадовую дзяўчынку», — кажа доктарка.
Такім чынам Ева з 14 сакавіка пачала наведваць спецыялізаваную школу.
«Там маленькая школа, толькі восем класаў. Яна спецыяльна для дзяцей з аўтызмам. Там усё неабходнае ёсць, у тым ліку свой закрыты дворык, пакоі сэнсарнай інтэграцыі, прыязныя настаўнікі», — дадала Мая.
Яна разам з Евай намалявала для мэра Беластока паштоўку з падзякай за ягоны клопат.
«Мы хочам паказаць, што мы сапраўды ўдзячныя яму. Зараз я змагу пайсці працаваць, пакуль Ева будзе вучыцца», — кажа Мая.
Цяпер чытаюць
Аляксандр Лукашэнка так ляснуўся на лёд на хакеі, што трыбуны замерлі ВІДЭА115
Аляксандр Лукашэнка так ляснуўся на лёд на хакеі, што трыбуны замерлі ВІДЭА
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher55
Каментары