На актывіста з Рагачова, які пакінуў краіну, завялі крымінальную справу
На актывіста з Рагачова Дзяніса Дашкевіча завялі крымінальную справу за абразу Лукашэнкі (артыкул 368 КК). Ён даведаўся пра гэта з дзяржаўнай раённай газеты «Свабоднае слова», піша «Зеркало».
У раённай газеце Рагачова «Свабоднае слова» 11 жніўня выйшаў кароткі агляд крымінальных навін, у якім паведамілі, што ў дачыненні да «апазіцыянера, які ўцёк у Польшчу», Дзяніса Дашкевіча завялі крымінальную справу за абразу прэзідэнта. Па сцвярджэнні аўтара калонкі, прычынай стала тое, што Дашкевіч у сваёй групе «Рагачоў Анлайн» у вайберы абразіў Лукашэнку.
Раней праз публікацыю на сайце «Рагачоў Анлайн» фота з Анджэем Дудам на фоне сцяга, падобнага да бел-чырвона-белага, на Дашкевіча завялі адміністрацыйную справу за распаўсюд «экстрэмісцкай» прадукцыі (артыкул 19.11 КаАП).
Дашкевіч з'ехаў з Беларусі амаль год таму, але да яго дадому ў Рагачове перыядычна прыходзяць сілавікі.
Каментары