Інфармацыя аб змяненні пазіцыі Беларусі на перамовах з Расіяй па нафце не адпавядае сапраўднасці, заяўляюць у Саўміне.
Інфармацыя аб змяненні пазіцыі Беларусі на перамовах з Расіяй аб пастаўках нафты, распаўсюджаная некаторымі СМІ, не адпавядае сапраўднасці,
заявіў прэс‑сакратар беларускага прэм’ер‑міністра Аляксандр Цімашэнка.
Пра тое, што «Беларусь прыме расійскія ўмовы пастаўкі нафты ў выпадку павелічэння Расіяй квоты пастаўкі нафты для ўнутраных патрэб Беларусі ў 2010 годзе з 6 млн. да 8—9 млн. тон», 14 студзеня паведаміла, у прыватнасці, агенцтва ПРАЙМ‑ТАСС.
«Інфармацыя пра тое, што «Беларусь не будзе настойваць
на міжбюджэтным размеркаванні экспартных пошлін, калі Расія павялічыць квоту паставак нафты для ўнутраных патрэб Беларусі з прапанаваных ёй зараз 6 млн. тон да 8—9 млн. тон «,
не адпавядае сапраўднасці»,— сказаў прэс‑сакратар прэм’ер‑міністра.
«Такую інфармацыю мог распаўсюдзіць толькі чалавек, вельмі далёкі ад гэтых перамоў, які мае вельмі аддаленае ўяўленне аб пазіцыі беларускага боку», — гаворыцца ў каментарыі Цімашэнкі.
Ён падкрэсліў, што беларуская пазіцыя па пытаннях пастаўкі нафты выкладзена ў лісце Аляксандра Лукашэнкі, накіраваным Дзмітрыю Мядзведзеву.
Гэтая пазіцыя, заўважыў Цімашэнка, «не мае нічога агульнага з пазіцыяй, агучанай нейкай крыніцай у органах дзяржкіравання», на якую спасылаліся СМІ.
У лісце Лукашэнкі, нагадаем, гаварылася: 10 снежня 2009 года ў ходзе пасяджэння Вышэйшага дзяржсавета Саюзнай дзяржавы Беларусі і Расіі прэзідэнтамі дзвюх краін была дасягнута дамоўленасць, што на працягу двух‑трох месяцаў 2010 года нафта будзе пастаўляцца ў Беларусь бяспошлінна, і за гэты час бакі ўзгодняць умовы далейшай пастаўкі нафты. Аднак потым Расійская Федэрацыя фактычна адмовілася ад выпрацаваных дамоўленасцей і вылучыла непрымальныя для Беларусі ўмовы».
Апошні раунд перамоў па пастаўках нафты адбыўся ў Маскве 9 студзеня. Пасля вяртання беларускай дэлегацыі ў Мінск прэс‑служба Савета міністраў Беларусі паведаміла, што «беларускі бок выставіў свае аргументы на аснове прававой базы двухбаковых адносінаў, падмацаваўшы разлікамі, раней узгодненымі экспертамі, аднак перамоўшчыкі з боку Расіі не ўзялі гэта пад увагу».
Дата аднаўлення перамоў пакуль невядомая.
Цяпер чытаюць
Мінчук забіў маці і цесця, а пасля 15 гадоў атрымліваў за іх пенсію1
Каментары