Святар царквы ў Сынкавічах разгарнуў будаўніцтва без дазволу чыноўнікаў. Вердыкт суда здзіўляе
Святара царквы Святога Архангела Міхаіла ў Сынкавічах хацелі прыцягнуць да адміністрацыйнай адказнасці за самавольнае будаўніцтва, расказвае Hrodna.life. Але суд вырашыў, што няведанне закона вызваляе ад адказнасці.
Протаіерэй Арсеній Ананька без дазволу чыноўнікаў і зацвярджэння праектнай дакументацыі за некалькі гадоў пабудаваў купель, трапезную, склеп дома для паломнікаў, мансарды, прыбудовы, паставіў на тэрыторыі манументальныя скульптуры.
Такім чынам, згодна з пратаколам аб адміністрацыйным правапарушэнні, святар парушыў закон «Аб архітэктурнай, горадабудаўнічай і будаўнічай дзейнасці».
Прадстаўнік прыходу ў суд Зэльвенскага раёна не прыйшоў. Аднак у лісце ён прасіў вызваліць прыход ад адказнасці ў сувязі з малазначнасцю зробленага. І суд пагадзіўся з гэтым аргументам.
У рашэнні гаворыцца, што пабудовы былі ўзведзеныя ў інтарэсах паломнікаў і вернікаў. Да таго ж святар учыніў правапарушэнне, бо не быў знаёмы з заканадаўствам. Пры гэтым шкоды інтарэсам грамадства ён, маўляў, не нанёс. Таму суд пастанавіў спыніць адміністрацыйную справу.
Царква-крэпасць у Сынкавічах — унікальны ўзор познегатычнай архітэктуры пачатку XVI стагоддзя, гэта была адна з першых цэркваў-крэпасцяў на тэрыторыі ВКЛ.
Цяпер чытаюць
«Гэтая партыя прайграная». Беларускія даследчыкі — пра тое, у што ператварылася Акадэмія навук4
Каментары