У Мінску ёсць прадуктовая крама-музей: яна сама паказвае, якія цэны тут былі 10 гадоў таму
Звычайна ўладальнікі крамаў не любяць расказваць, якая цана была на прадукты месяц ці год таму, а то пакупнікі могуць вырашыць, што ўсе тавары падаражэлі неабгрунтавана. Але сайт Blizko.by адшукаў у Мінску магазін, які літаральна крычыць, паказваючы, якія цэны былі ў ім 10 гадоў таму.
Чытачка падказала выданню цікавы адрас і нават падзялілася фатаграфіямі, зробленымі некалькі гадоў таму.
Звонку вокны крамы абклееныя фатаграфіямі інтэр'ераў гэтай самай крамы, прычым фатаграфіі настолькі дэталёвыя, што добра бачныя цэннікі на прадукты.
На цэнніках яшчэ тысячы і дзясяткі тысяч рублёў! Гэта значыць, што здымка вялася да дэнамінацыі, якая адбылася амаль 7 гадоў таму — у ліпені 2016-га.
Праверка Яндэкс-панарам паказала, што такімі самымі вітрыны былі яшчэ ў 2014 годзе. Атрымліваецца, крама проста цяпер расказвае нам, якімі былі цэны тут мінімум 10 гадоў таму, калі не раней.
Гэта крама па Партызанскім праспекце, 120, магазін Заводскага райхарчгандлю — дзяржаўнай сеткі ўніверсамаў.
Сапраўды, усе вокны заклееныя фатаграфіямі шчаслівых пакупнікоў на тле паліц з прадуктамі.
Дарэчы, у ЗРХГ ёсць яшчэ адна падобная крама — на Партызанскім праспекце, 67, — але там на фатаграфіях цэннікі зусім нечытэльныя.
Тут жа мы можна ўзгадаць, па колькі прадаваліся прадукты з дзясятак гадоў таму. Каб перавесці старыя цэны ў новыя, трэба іх падзяліць на 10 тысяч.
Праўда, зусім паўнавартаснае параўнанне правесці не атрымаецца, бо, па-першае, на вулічных фота цэннікі бачныя амаль усюды ў кандытарскіх вырабаў, а, па-другое, рэдка якія брэнды і назвы захаваліся ў тым жа выглядзе за 10 гадоў.
Фруктовы нектар, прыдатны для дзіцячага харчавання: 3.630 — 5.380 рублёў (гэта значыць, на цяперашнія грошы 36-54 капейкі. Далей пераводзьце самі). Цяпер пюрэ ў гэтай самай краме каштуе 1,13-1,56 рубля. Гэта значыць, падаражэла ў 3 разы.
Каша безмалочная кукурузная і грэцкая для дзіцячага харчавання — 7 940 — 8 180 рублёў. Цяпер падобная каштуе 3,07 — 4,25 рубля. Тут падаражанне прыкладна ў 4-5 разоў.
Батон «Прамяністы» — адзіны від, цэннік якога трапіўся на фота: 1 830 рублёў (гэта 18 капеек цяперашнімі!). Цяпер батон каштуе 1,13-1,82 рубля. Падаражанне ў 6-10 разоў!
Печыва «Васільковы Слодыч» — рэдкі від, які сышоўся адзін у адзін. Каштаваў 2 450 рублёў за пачак, цяпер — роўна рубель. Падаражанне ў 4 разы.
Цукеркі «Любімая Аленка», 300 грамаў: было 34 900 рублёў, стала 11,67 рубля. Падаражанне ў 3,5 раза.
Малако каштавала 4 580-7 070 рублёў, а цяпер каштуе ў сярэднім 2,25-3,5 рубля. Малочныя прадукты таксама падаражэлі прыкладна ў 5 разоў.
Тваражкі і ёгурты: каштавалі 2 850-6 190 рублёў, а цяпер каштуюць 0,69-2,64 рубля. Гэта стала даражэй у 3-4 разы.
Бабруйскі зефір, 6 штук ва ўпакоўцы: каштаваў такі 7 800 рублёў. Цяпер аналагічны каштуе 2,59-3,71 рубля. Зноў падаражанне ў 3-4 разы.
І яшчэ некалькі фатаграфій старых вітрын для самастойнага параўнання.
У Мінску каля гандлёвага цэнтра паставілі «першае нацыянальнае» велікоднае яйка ФОТЫ
Стала вядома, дзе ў Мінску адкрыецца першая крама расійскага канкурэнта «Мілы» і «Вострава чысціні і смаку»
Пельмені, піца, паўэрбанкі… Якія гандлёвыя аўтаматы сёння працуюць у Мінску, а якія абяцалі, ды так і не паставілі?
Каментары