106-гадовы амерыканец вярнуў сабе тытул самага пажылога парашутыста ў свеце
Альфрэд «Ал» Блашке, які нарадзіўся 4 студзеня 1917 года, афіцыйна вярнуў сабе статус чалавека, які скокнуў з парашутам у самым сталым узросце. Пра гэта паведамляе Кніга рэкордаў Гінэса.
На момант скачка Алу было 106 гадоў 327 дзён, што больш чым на тры гады перавышае папярэдні рэкорд. Упершыню ён пабіў рэкорд у 2020 годзе, ва ўзросце 103 гадоў, калі выскачыў з самалёта, які рухаўся на вышыні 4200 метраў, каб адсвяткаваць выпускны сваіх унукаў-блізнят.
«Гэта была мая мара. Я ніколі не думаў, што пражыву так доўга», — сказаў тады ён.
Той скачок быў для яго другім — першы адбыўся за тры гады да таго, на стогадовы юбілей.
Цяпер жа Альфрэд вырашыў зрабіць свой трэці і, як сцвярджае, апошні скачок з парашутам пасля таго, як у 2022 годзе ягоны рэкорд пабіла шведка Рут Ларсан, якая пражыла 103 гады 259 дзён.
Да доўгажыхара далучыўся губернатар Тэхаса Грэг Эбат, які пагадзіўся скокнуць з парашутам разам з ім яшчэ тады, калі яны сустрэліся пасля таго, як пенсіянер упершыню пабіў рэкорд. Аднак з-за непагадзі і праблем з раскладам скачок адкладалі чатыры разы.
Аднак жа раніцай 27 лістапада 2023 года Альфрэд Блашке і губернатар Грэг Эбат сабраліся і падняліся на борт самалёта. Іх паднялі на вышыню 2,7 км, дзе яны далучыліся да сваіх дасведчаных інструктараў і скокнулі з самалёта ў свабоднае падзенне. Знізу за скачком назіралі ўсе дзеці і ўнукі Альфрэда, а таксама прадстаўнікі СМІ і члены амерыканскага ўрада.
Асноўны парашут рэкардсмена адкрыўся на вышыні 1,6 км, пасля чаго ён спусціўся да месца бяспечнага прызямлення разам са сваім інструктарам. Аддыхаўшыся, ён паціснуў руку губернатару Эбату і павіншаваў яго з першым у ягоным жыцці скачком з парашутам.
Пасля таго мужчына сказаў прысутным журналістам:
«Калі вы думаеце, што не можаце, вы проста недаацэньваеце сябе. Кожны чалавек здольны на большае, чым ён думае. Яму проста трэба прыняць рашэнне паспрабаваць».
Цяпер чытаюць
Мікола Статкевіч павіншаваў беларусаў з Днём Волі, запісаўшы першае ВІДЭА пасля вызвалення7
Каментары