А вы ведаеце, што ў Мінску таксама прайшлі Алімпійскія гульні? І нават запалілі алімпійскі агонь
Асноўныя спаборніцтвы, безумоўна, прайшлі ў 1980-м у Маскве, але некаторым гарадам СССР таксама пашанцавала. У Таліне адбылася ветразевая рэгата, а ў Кіеве, Ленінградзе і Мінску згулялі некаторыя футбольныя матчы.
Да Алімпіяды рыхтаваліся доўга. Абнавілі гасцініцы, пабудавалі гасцініцу «Планета», зрабілі трасу М1 — так званую «алімпійку».
На стадыёне «Дынама», які стаў цэнтральным аб'ектам Алімпіяды-80 у сталіцы Беларусі, паставілі гіганцкія мачты асвятлення (у 2019-м іх замянілі новымі), зрабілі табло і надбудавалі другі ярус трыбун, давёўшы колькасць месцаў да 50 тысяч.
У Мінск алімпійскі агонь прывезла чатырохразовая алімпійская чэмпіёнка (1972, 1976) Вольга Корбут. На Цэнтральнай плошчы (цяпер плошча Незалежнасці) прайшоў урачысты мітынг, піша «Спутнік».
На стадыёне агонь запальваў вядомы беларускі барэц Аляксандр Мядзведзь.
Існуе байка, што Мядзведзь пасля запальвання вялікага факелу апусціў сваю маленькую паходню ў спецыяльна пастаўленае на гэты выпадак вядро, і агонь прапаліў яго наскрозь літаральна да бетону трыбун.
У Мінску гулялі зборныя Алжыра, Ірака, Іспаніі, Коста-Рыкі, Сірыі, Фінляндыі і Югаславіі. Дарэчы, купіць квіткі на футбольныя матчы ў касах было практычна немагчыма.
У нас прайшлі матчы Алжыр — Сірыя (3:0), Іспанія — Сірыя (0:0), Іспанія — Алжыр (1:1), а таксама матчы зборнай Югаславіі з Фінляндыяй (2:0), Коста-Рыкай (3:2) і Ірака (1:1).
Таксама ў Мінску прайшоў чвэрцьфінал Югаславія — Алжыр (3:0).
Потым асноўныя падзеі перанесліся ў Маскву.
Нагадаем, што частка краін байкатавала тую Алімпіяду, аднак некаторыя краіны паслалі свае дэлегацыі пад алімпійскім сцягам.
Цяпер чытаюць
Слова «Унаватуна» значыць «рай». Дзе на Шры-Ланцы адпачывала Мельнікава5
Каментары