Гарбунова: «А Паліна Шарэнда-Панасюк? Дзеля чаго гэтая барацьба? Яна бессэнсоўная»
Былая «міністарка па палітвязнях» упэўненая, што Аляксандр Лукашэнка шчыра хоча перагарнуць старонку.
Адзін з самых неадназначных момантаў праграмнага інтэрв'ю Вольгі Гарбуновай на «Радыё Свабода» — яе рэзкія заўвагі пра «бессэнсоўнасць барацьбы», прамоўленыя ўслед за згадкай імені палітзняволенай Паліны Шарэнды-Панасюк.
Брэсцкая актывістка Паліна Шарэнда-Панасюк знаходзіцца за кратамі са студзеня 2021 года. Першасна ёй прысудзілі два гады зняволення, але ўжо двойчы накідвалі яшчэ па годзе калоніі за «непадпарадкаванне патрабаванням адміністрацыі». Цяпер Паліну чакае чарговы суд.
У снежні 2022 года Вольга Гарбунова была прызначаная міністаркай па сацыяльнай палітыцы ў Аб'яднаным пераходным кабінеце, фактычна адказнай за палітвязняў. Цяпер яна абвесціла аб сваёй адстаўцы і расказала пра ідэйную нязгоду з ранейшымі паплечнікамі.
Гарбунова запэўнівае, што рэжым Аляксандра Лукашэнкі хоча перагарнуць старонку і ў гэтым не крывадушнічае.
«Ці перакананыя вы, што рэжым хоча перагарнуць старонку?», — перапытвае ў яе «Радыё Свабода».
«А якая перспектыва? Мой асабісты інтарэс — вярнуцца дадому, абняць родных, саджаць дрэвы і неяк самарэалізоўвацца. Жыццё мне паказала, што ідэй можа быць многа. У людзей, якія цяпер у новай камандзе ў Мінску, на добрым узроўні прыняцця рашэнняў ёсць многа перспектыў і магчымасцяў. Я мяркую, што ёсць бачанне, бо ёсць адпаведны бэкграўнд.
Што да пазіцыі міжнароднай супольнасці, якая не вядзе перамоваў з тэрарыстамі… Мы пабачылі 1 жніўня вялікі абмен з выхадам расійскіх палітвязняў. Гэта сігнал для нас, што насамрэч ёсць і захоўваецца шмат магчымасцяў. Тут пытанне, на якую дапамогу мы можам разлічваць… Каго рэальна непакоіць лёс Марыі Калеснікавай, якая важыць 45 кілаграмаў пры росце 175 сантыметраў, якая знаходзіцца ў абсалютнай ізаляцыі… Я не ўяўляю, як столькі часу знаходзіцца ў адзіночным зняволенні.
Між іншым, Калеснікава заўсёды выступала за мірныя перамовы, за дыялог з уладамі. Згадайце яе з'яўленне на вуліцах Мінска, калі яна была на свабодзе. А Паліна Шарэнда-Панасюк? Дзеля чаго гэтая барацьба? Яна бессэнсоўная. Проста знішчэнне чалавека і сям’і»,
— адказала Вольга Гарбунова.
Галоўны ідэолаг Беларусі знайшоў у краіне «псеўдапатрыятычныя ячэйкі» і заклікаў да змагання з імі «адзіным баявым кулаком»23
Каментары