На вайне ва Украіне загінуў расійскі актывіст, які быў супраць вайны і заклікаў не ісці на яе
Адзін з актыўных удзельнікаў экалагічнага пратэсту супраць будаўніцтва смеццевага палігона на станцыі Шыес Яўген Абакумаў загінуў на вайне ва Украіне, ваяваўшы на баку Расіі, піша «Новая газета. Еўропа».
Запіс пра яго гібель гарадскія публічныя старонкі архангельскага горада Котлас апублікавалі 7 ліпеня.
Інфармацыю пра смерць Абакумава «Новая газета Еўропа» пацвердзілі яго знаёмыя. У размове былыя паплечнікі Абакумава па пратэсце распавялі, што мужчына адправіўся ў зону баявых дзеянняў у красавіку, а пра яго смерць стала вядома яшчэ ў канцы чэрвеня. Такім чынам, на фронце ён прабыў менш за тры месяцы.
Па непацверджанай інфармацыі, гібель наступіла ў выніку артылерыйскага абстрэлу будынка, дзе знаходзіліся расійскія вайскоўцы.
Абакумаву было 48 гадоў. У Котласе жывуць яго жонка і сын. Звязацца з сваякамі Абакумава не змагла.
Прычыны, па якіх Абакумаў вырашыў адправіцца на вайну, незразумелыя. Удзельніца пратэстаў на Шыесі з Комі на ўмовах ананімнасці расказала, што Абакумаў выступаў супраць вайны з Украінай і адгаворваў людзей ісці ў прызыўныя пункты пасля абвяшчэння «частковай мабілізацыі».
«Сябру-ўкраінцу дапамог пакінуць Украіну разам з сям’ёй. Лічыў, што тое, што адбываецца — гэта сусветны перадзел капіталаў, а аддаваць сваё жыццё за чужыя камерцыйныя інтарэсы — глупства», — распавяла экаактывістка.
Абакумаў быў адным з актыўных удзельнікаў пратэстаў на Шыесе: мужчына быў адным з ініцыятараў стварэння міжрэгіянальнай экалагічнай кааліцыі «Стоп-Шыес», утворанай у кастрычніку 2019 года.
«Ён вельмі дапамагаў ва ўсім, быў рашучы і добра арганізаваны. Ён змог курыраваць працу групы юрыстаў, не маючы ніякага дачынення да юрыспрудэнцыі», — патлумачыў экаактывіст з Архангельскай вобласці Дзмітрый Сякушын. Калі пратэсты пачаліся, Абакумаў працаваў машыністам цягніка.
У перадвыбарчы перыяд перад выбарамі губернатара ў верасні 2020 года Абакумава спынілі паліцэйскія недалёка ад уласнага дома. У аўтамабілі актывіста знайшлі улёткі, у якіх «Адзіная Расія» названа «партыяй жулікаў і злодзеяў». Паліцыя адпусціла актывіста, але наклад улётак канфіскавала.
Акрамя перадвыбарчых кампаній, актывіст займаўся антыкарупцыйнымі расследаваннямі ў органах гарадской улады. У 2021 годзе Абакумаў стаў дарадцам новай кіраўніцы Котласа Святланы Дайнека якая заняла пасаду Андрэя Бральніна, адпраўленага ў адстаўку незадоўга да завядзення супраць яго крымінальнай справы па артыкулах аб хабары і злоўжыванні службовымі паўнамоцтвамі. У 2023 годзе ў адстаўку сышла ўжо сама Дайнека, але Абакумаў працягнуў працаваць у адміністрацыі Котласа.
Цяпер чытаюць
Раман Пратасевіч асвоіў прафесію бармена і адшукаў працу. Вось у якім бары можна яго знайсці10
Каментары