Адміністрацыя прэзідэнта ЗША Дональда Трампа атрымала ад Расіі новыя прапановы па ўрэгуляванні ва Украіне. Пра гэта на брыфінгу ў чацвер паведаміла афіцыйная прадстаўніца Дзярждэпартамента Тэмі Брус.
Паводле яе слоў, новыя ідэі Крамля былі агучаны на сустрэчы дзяржсакратара Марка Рубіа і кіраўніка МЗС РФ Сяргея Лаўрова, якая адбылася напярэдадні ў Малайзіі.
«Расіяне падзяліліся некаторымі ідэямі, якія ён (Рубіа) данясе да прэзідэнта. І, вядома, мы паглядзім, што ён скажа. Прэзідэнт заўсёды кіруе рашэннямі такога роду», — сказала Брус.
Яна нагадала, што і Рубіа, і Трамп расчараваныя адсутнасцю прагрэсу ва ўрэгуляванні крызісу вакол Украіны.
Сам кіраўнік Дзярждэпа, пакідаючы Малайзію, дзе прайшла сустрэча з Лаўровым, што доўжылася менш за гадзіну, заклікаў не чакаць шмат ад новых прапаноў Крамля.
«Я б не назваў гэта чымсьці, што гарантуе мір», — сказаў ён.
Каментары