Аўтобус з Вільні ў Мінск не прапусцілі праз мяжу, пасажыры дабіраліся самі
З нядаўняга часу з Мінска ў Вільню замест 28 аўтобусных рэйсаў у дзень ездзіць толькі 15. 12 жніўня адразу два буйныя перавозчыкі — беларускі «Мінсктранс» і літоўскі Eurolines — абвясцілі пра прыпыненне большасці паездак.
Пры гэтым беларуская кампанія адзначала, што змены ўступяць у сілу толькі з 14 жніўня. Але з праблемамі сутыкнуліся ўжо пасажыры вечаровых аўтобусаў 13 жніўня: людзей, што ехалі з Вільні, разварочвалі проста на літоўскай мяжы і не пускалі ў Беларусь. У адным з іх была Наталля, якая пра тое, што адбылося, расказала «Люстэрку».
Беларуска Наталля ехала ў Мінск на аўтобусе «Мінсктранса» ўвечары 13 жніўня. З Вільні ён выехаў па раскладзе. На мяжы перад ім было яшчэ два аўтобусы, у выніку ў чарзе пасажыры прастаялі каля трох гадзін.
— Потым аўтобус перад намі (таксама «Мінсктранса») развярнулі ў бок Літвы, — успамінае яна. — Ніхто не ведаў, у чым праблема. Мы прастаялі яшчэ — а потым развярнулі і нас. Прычына, як нам сказалі, у тым, што «Мінсктранс» перавысіў квоту перавозчыка. Пасля кіроўца паведаміў, што 16 чалавек могуць забраць [далей] — але гэта перасадка ў іншы аўтобус [які прапусцілі праз мяжу], і яна не бясплатная. Пайшлі пажылыя і сем'і з дзецьмі.
Нехта вырашыў прасіць кіроўцаў легкавых аўтамабіляў, якія праязджалі міма, узяць іх да сябе ў машыну, каб прайсці мяжу, расказвае Наталля. Але большасць пасажыраў засталася ў аўтобусе. На пытанні здзіўленых людзей кіроўца сказаў, што можа толькі адвезці іх назад на вакзал у Вільню.
— Тады патэлефанавала на гарачую лінію «Мінсктранса» і расказала сітуацыю. Яны адказалі, што ведаюць пра гэта, што не толькі нас развярнулі, але нічога з гэтым зрабіць не могуць. На пытанне, што рабіць нам, адказ: «Шукайце іншыя аўтобусы». Хоць я глядзела — месцаў не было, — расказвае жанчына.
Са словаў суразмоўніцы, у кампаніі сказалі, што адразу грошы за білет вярнуць не могуць. Тым часам аўтобус прыехаў назад на вакзал у Вільню, было ўжо бліжэй да ночы. Пасля доўгага чакання беларусцы пашанцавала: у адзін з аўтобусаў іншага перавозчыка не прыйшлі людзі, і яна села на вольнае месца. Праўда, давялося купіць новы білет.
— Дарога заняла 15 гадзін, — апісвае яна. — У сябе яшчэ не прыйшла. Патрэбныя суткі, каб аднавіць сілы, а на нервы — нават больш.
Каментары