У Еўропе выкрылі беларускую шпіёнскую сетку. Арыштавалі былога кіраўніка малдаўскай контрразведкі

47-гадовы падазраваны быў дастаўлены ў Румынію пракурорамі DIICOT. Адносна яго вядзецца расследаванне па абвінавачванні ў дзяржаўнай здрадзе шляхам перадачы звестак, якія складаюць дзяржаўную таямніцу.

Пацвярджаецца, што абвінавачаны кантактаваў з супрацоўнікам беларускай разведкі, які працаваў у Празе як дыпламатычны прадстаўнік і якога ўжо выслалі з Чэхіі.

Пракуроры сцвярджаюць, што пачынаючы з 2024 года і па цяперашні час падазраваны, які раней займаў кіраўнічыя пасады ў Службе інфармацыі і бяспекі (SIS) Рэспублікі Малдова,

«займаўся несанкцыянаваным раскрыццём дзяржаўнай таямніцы прадстаўнікам замежнай дзяржавы, а менавіта супрацоўнікам Камітэту дзяржаўнай бяспекі Рэспублікі Беларусь, якія маглі працаваць на Беларусь».

Сцвярджаецца, што ў перыяд з 2024 па 2025 год ён двойчы сустракаўся з супрацоўнікамі беларускага КДБ, абодва разы ў Будапешце.

«Маюцца абгрунтаваныя падазрэнні, што гэтыя сустрэчы былі накіраваныя на перадачу інструкцый і аплату аказаных паслуг», — сцвярджае цытаваная крыніца.

Расследаванне, якое праводзіцца пад эгідай EUROJUST, адбывалася пры падтрымцы разведвальных службаў Румыніі, Венгрыі і Чэхіі, а таксама пракурораў Венгрыі, Чэхіі і Рэспублікі Малдова.

Служба разведкі Румыніі пацвярджае і адзначае, што гэтая справа была дакументаваная «асаблівымі спосабамі» SRI, але ў супрацоўніцтве з вонкавымі партнёрамі, тымі ж, на якіх звярнуў увагу DIICOT, да якіх «на завяршальным этапе» дадалася Польшча пры падтрымцы разведвальнай службы Рэспублікі Малдова.

G4Media піша, што гаворка ідзе пра былога намесніка дырэктара разведвальнай службы Рэспублікі Малдова. Крыніцы, блізкія да расследавання, паведамілі выданню, што ён быў затрыманы ў аэрапорце румынскага горада Цімішаара.

Адначасова Чэшская Рэспубліка прыняла рашэнне аб высылцы «беларускага разведчыка, які працаваў у Чэхіі пад прыкрыццём дыпламата».

«Мы раскрылі беларускую разведвальную сетку ў Еўропе! Служба разведкі і бяспекі сумесна са спецслужбамі Румыніі і Венгрыі паспяхова ўмяшалася і раскрыла беларускую разведвальную сетку, выбудаваную ў Еўропе. У сувязі з гэтай міжнароднай аперацыяй прынята рашэнне аб высылцы беларускага разведчыка, які працаваў у Чэхіі пад прыкрыццём дыпламата», — піша чэская спецслужба ў сацсетцы X.

На сайце Службы разведкі і бяспекі Чэхіі гаворыцца, што разведвальная сетка ў Еўропе была створаная разведкай Камітэта дзяржаўнай бяспекі Беларусі, аднак яе намаганні па атрыманні крыніц і разведвальнай інфармацыі не змаглі застацца па-за ўвагай спецслужбаў:

«Гэта яшчэ адзін выпадак з серыі, які паказвае, наколькі важнае міжнароднае супрацоўніцтва ў цяперашняй сітуацыі ў сферы бяспекі. Гэта таксама адказ тым, хто сцвярджае, што супрацоўніцтва паміж разведвальнымі службамі нібыта не працуе», — пракаментаваў навіну пра ліквідацыю беларускай разведвальнай сеткі дырэктар Бюро разведкі і бяспекі Чэхіі Міхал Коўдзелка.

У паведамленні гаворыцца, што, сярод іншага, сумесная група еўрапейскіх разведчыкаў выявіла супрацоўнікаў і памагатых КДБ Беларусі, якія дзейнічаюць у некалькіх еўрапейскіх краінах, у тым ліку былога намесніка кіраўніка Службы дзяржаўнай бяспекі Малдовы (SIS), які перадаваў сакрэтную інфармацыю КДБ.

Беларусы, гаворыцца ў паведамленні, змаглі пабудаваць агентурную сетку галоўным чынам дзякуючы магчымасці свабоднага перамяшчэння па Еўропе.

«Каб паспяхова супрацьстаяць гэтай варожай дзейнасці ў Еўропе, нам неабходна абмежаваць перамяшчэнне акрэдытаваных дыпламатаў з Расіі і Беларусі ў Шэнгенскай зоне», — кажа Коўдзелка, дадаючы, што разведвальныя службы гэтых дзяржаў па-ранейшаму спрабуюць выкарыстоўваць дыпламатычнае прыкрыццё для сваёй разведвальнай дзейнасці і працягваюць спробы пашырыць сваю прысутнасць у Еўропе.

Сумесная разведвальная аперацыя курыруецца еўрапейскім агенцтвам EUROJUST, якое базуецца ў Гаазе (Нідэрланды), дзе Чэшскую Рэспубліку цяпер прадстаўляе былы Вярхоўны пракурор Павел Земан.

• 13
• 0
• 0
• 0
• 0
• 0
• 0
• 0