Ці змогуць самалёты «Белавія» пасля зняцця санкцый ЗША зноў лётаць у Еўропу?
11 верасня ЗША знялі санкцыі з авіякампаніі «Белавія». Пра гэта на сустрэчы з Аляксандрам Лукашэнкам паведаміў прадстаўнік прэзідэнта ЗША Джон Коўл. ЗША ўвялі санкцыі супраць «Белавія» 9 жніўня 2023 года. Пад санкцыямі Еўрасаюза авіякампанія знаходзіцца з снежня 2021 года. «Радыё Свабода» распытала былога супрацоўніка кампаніі, які займаўся тэхнічным абслугоўваннем, што дае адмена амерыканскіх санкцый.
Сяргей (імя змененае на просьбу суразмоўцы — РС) падкрэслівае, што «Белавія» усё яшчэ пад санкцыямі ЕС, а ў ЗША самалёты авіякампаніі не лёталі і раней. На ягоную думку, найперш зняцце абмежаванняў закране тэхнічныя і рэпутацыйныя пытанні для кампаніі.
«Найперш разблакуецца магчымасць прамых закупак камплектуючых. Таксама размарожваецца магчымасць абнаўляць праграмнае забеспячэнне, навігацыйныя базы даных. Гэта таксама магчымасць закупак самалётаў, тых жа Boeing. Магчыма, раней замарожаныя пастаўкі даедуць да кампаніі. Можа адкрыцца шлях для навучання пілотаў, бо раней пілоты ездзілі навучацца ў Еўропу. Магчыма, цяпер яны змогуць навучацца ў ЗША», — гаворыць суразмоўца.
Былы супрацоўнік «Белавія» прыводзіць прыклад, як раней кампанія набыла самалёты Airbus праз пасярэднікаў, а навучанне пілотаў з-за санкцый праводзілі расіяне. Пасля зняцця санкцый, на думку суразмоўцы, такое навучанне можа быць дасягальнае і ў ЗША.
Аднак зняцце санкцый не прывядзе да ўвядзення прамых рэйсаў з ЗША, дадае спецыяліст. На гэта няма тэхнічных магчымасцяў. Але гэта добра для рэпутацыі кампаніі, адзначае суразмоўца. Гаворка пра аднаўленне рэйсаў з Мінска ў Еўропу таксама пакуль не можа весціся, Еўрасаюз свае санкцыі ў дачыненні да «Белавія» не адмяняў.
«Рэпутацыйна «Белавія» шмат атрымлівае. Пазітыў таксама ў тым, што авіякампанія сыходзіць ад расійскай залежнасці. Расія цяпер прапагандуе імпартазамяшчэнне ў галіне авіябудаўніцтва. Зняцце абмежаванняў дае магчымасць пазбавіцца прымусовага набыцця расійскіх лайнераў і дэталяў», — гаворыць суразмоўца.
Цяпер чытаюць
Зала ў Мінску ўстала пры выкананні «Малітвы» Янкі Купалы ВІДЭА3
Каментары
Бяспека беларускай моладзі, якую вы хочаце зачыніць жалезнай заслонай ад Еўропы, вам па-барабану?