Павел Калаур: Сітуацыя ў банкаўскай сферы працягвае заставацца няпростай

Сітуацыя ў банкаўскай сферы працягвае заставацца няпростай. Пра гэта заявіў першы намеснік старшыні кіраўніцтва Нацыянальнага банка Беларусі Павел Калаур 23 красавіка ў Мінску на пасяджэнні Міжнароднага каардынацыйнага савета банкаўскіх асацыяцый (МБС) краін СНД, Цэнтральнай і Усходняй Еўропы.

Ён сказаў, што на сёння адзначаецца аптымістычны рост сусветнай эканомікі. «Разам з тым мы павінны памятаць пра назапашаныя рызыкі ў банкаўскай сістэме, якія будуць рэалізоўвацца сёлета», — падкрэсліў першы намеснік кіраўніка Нацбанка.

Паводле яго слоў, гэта праблема актуальная і для беларускіх банкаў. «Нашы прагнозы па праблемных актывах на канец года — 10%, мы ўжо маем 5,5%», — сказаў Калаур, адзначыўшы рост гэтага паказчыку ў параўнанні з пачаткам года.

«Вядома, запас трываласці ў прадпрыемстваў у нейкай ступені заканчваецца.

У той жа час запас трываласці ў банкаў застаецца на значным узроўні. Мы прагназуем, што сістэма з гэтымі выклікамі справіцца. Але, безумоўна, гэта запатрабуе намаганняў ад кіраўнікоў нашых банкаў для таго, каб у новых умовах наладзіць больш аптымальную працу сваіх устаноў», — сказаў першы намеснік кіраўніка Нацбанка.

Ён адзначыў, што банкі, як і рэальны сектар эканомікі, вымушаны працаваць у няпростых умовах. Разам з тым банкаўская сістэма Беларусі летась спраўлялася з выкананнем ускладзеных на яе функцый належным чынам. «У нас не было банкруцтваў банкаў, нашы банкі спрацавалі з прыростам, але самае галоўнае, што яны працягвалі крэдытаваць эканоміку. Удзельная вага актываў банкаўскай сістэмы да ВУП цяпер складае 61,8% і ў параўнанні з аналагічным перыядам яна вырасла на 8%. Гэта добры паказчык, але тут трэба быць аб’ектыўнымі і адзначыць, што ва ўмовах падзення сусветнай эканомікі летась у Беларусі ўсё ж дасягнуты невялікі рост ВУП — 0,2%, г.зн. макраэканамічныя ўмовы для нашых банкаў у мінулым годзе ўсё ж былі больш спрыяльнымі, чым у краін‑суседзяў», — сказаў Калаур.

Пры гэтым ён адзначыў, што з боку ўрада і Нацбанка была аказана сур’ёзная падтрымка як рэальнага сектара эканомікі, так і саміх банкаў з пункту гледжання падтрымання іх ліквіднасці.

«Усё гэта ў сукупнасці дазволіла забяспечыць стан банкаў, якое мы маем на сённяшні дзень», — сказаў напрыканцы першы намеснік кіраўніка Нацбанка.

У пасяджэнні Міжнароднага банкаўскага савета бяруць удзел банкіры больш чым 10 дзяржаў: Беларусі, Расіі, Украіны, Казахстана, Кыргызстана, Азербайджана, Грузіі, Таджыкістана, Узбекістана, Польшчы, Сербіі, а таксама кіраўнікі Нацбанка Беларусі, Цэнтрабанка Расіі, Агенцтва па страхаванні ўкладаў (РФ). Арганізатар мерапрыемства — Асацыяцыя беларускіх банкаў. Як паведамляецца ў прэс‑рэлізе асацыяцыі, адкрые мерапрыемства кіраўнік Нацбанка Беларусі Пётр Пракаповіч. Асноўнае пытанне пасяджэння — «Эфектыўнае ўзаемадзеянне фінансавага і рэальнага сектараў як аснова эканамічнага росту ў краінах СНД, Цэнтральнай і Усходняй Еўропы». Запланавана таксама сустрэча ўдзельнікаў пасяджэння з кіраўніцтвам Нацбанка, шэраг двухбаковых сустрэч з кіраўнікамі беларускіх банкаў.

У пасяджэнні таксама бярэ ўдзел экс‑старшыня Дзярждумы РФ Генадзь Селязнёў, які цяпер з’яўляецца старшынёй савета дырэктараў «Мосаблбанка».

Даведка БелаПАН. Міжнародны банкаўскі савет утвораны ў 2004 годзе пры ўдзеле Асацыяцыі беларускіх банкаў у мэтах развіцця міждзяржаўнага эканамічнага супрацоўніцтва. Акрамя асацыяцый банкаў краін СНД, яго членам з’яўляецца Банкаўская асацыяцыя краін Цэнтральнай і Усходняй Еўропы, якая аб’ядноўвае банкі з 25 еўрапейскіх дзяржаў.

Асацыяцыя беларускіх банкаў (www.abbanks.by) створана ў 1990 годзе для каардынацыі дзейнасці банкаў. Яе членамі з’яўляюцца ўсе беларускія банкі і аўдытарскія арганізацыі, Беларуская валютна‑фондавая біржа, Банкаўскі працэсінгавы цэнтр.

• 0
• 0
• 0
• 0
• 0
• 0
• 0
• 0