Белстат падвёў вынікі абследавання, прысвечанага таму, як беларусы выкарыстоўваюць свой сутачны час. Абследаванне праводзілася з красавіка 2024 года па сакавік 2025 года і ахапіла каля 12000 чалавек ва ўзросце ад 10 гадоў і старэйшых. Кожны ўдзельнік запаўняў дзённікі, дзе падрабязна фіксаваў усе віды дзейнасці на працягу працоўнага і выхаднога дня.
Вынікі абследавання паказалі, што беларусы, старэйшыя за 10 гадоў, амаль палову свайго сутачнага часу — 11 гадзін 35 хвілін — трацяць на клопат пра сябе: сон, прыём ежы, асабістую гігіену. Каля васьмі гадзін ідзе на працу, вучобу, хатнія справы і дапамогу сям’і, сябрам ці сваякам. На вольны час застаецца ў сярэднім 4 гадзіны 18 хвілін.
У параўнанні з вынікамі дзесяцігадовай даўніны беларусы сталі больш спаць (на 16 хвілін) і есці (на 4 хвіліны даўжэй), але маюць менш вольнага часу — яго стала на 18 хвілін меней.
За ўсё жыццё сярэдні беларус праводзіць каля 28 гадоў у сне, 13,5 гадоў у яго вольны час (з іх больш за 6 гадоў — перад тэлевізарам), 11 гадоў на працы, 4 гады за сталом, 2,5 гады на прыгатаванне ежы, 1 год і 7 месяцаў — на прыбіранне і пранне, і яшчэ каля 11 месяцаў — на пакупкі і паслугі.
Даследаванне таксама паказала, што размеркаванне часу мае гендарныя асаблівасці. Агульная працягласць працоўнага часу ў жанчын (платная праца і бясплатная па доме і доглядзе за сям’ёй) звычайна большая, чым у мужчын, што ўплывае на іх вольны час. Дзесяць гадоў таму жанчыны трацілі на хатнія справы ў два разы больш часу, чым мужчыны, цяпер гэтая розніца скарацілася да 1,7 раза.
Для параўнання, у сярэднім па свеце жанчыны выконваюць хатнюю працу і догляд за членамі сям’і ў 2,5 раза больш, чым мужчыны (згодна з апошнім гендарным аглядам ад структуры «ААН-жанчыны»).
Сцвярджаецца, што праграма і методыка беларускага абследавання былі распрацаваныя з улікам міжнародных стандартаў у гэтай галіне.
Дажыліся: пагалоўе свіней у Пскоўскай вобласці ў 6 разоў большае, чым у Віцебскай
Прадстаўніца Акадэміі навук раскрыла ўзровень нараджальнасці ў Беларусі. Ён жахліва нізкі
У якіх беларускіх гарадах жыве больш за 100 тысяч чалавек
Насельніцтва Мінска не расце, але паглядзіце, як прыбавілася колькасць жыхароў у Новай Баравой і іншым прыгарадзе
Чаму ўсё больш жанчын цяпер носяць доўгія валасы?
Каментары