Мінскі абласны выканаўчы камітэт аб'явіў конкурс на стварэнне сімвала чэмпіянату Беларусі па колцы дроў. Чыноўнікі лічаць, што пасля сёлетняга мерапрыемства яго папулярнасць так узрасла, што ўзнікла патрэба ў яго ўнікальным і пазнавальным сімвале.
Удзельнічаць у конкурсе могуць супрацоўнікі цэнтральных і рэгіянальных СМІ, прэс-службы міністэрстваў і ведамстваў, блогеры, і ўвогуле ўсе зацікаўленыя асобы.
Сярод мэтаў конкурсу — не толькі стварыць яркі і лёгка пазнавальны сімвал чэмпіянату і ўзмацніць яго вядомасць у інфармацыйнай прасторы, але і сфарміраваць станоўчыя эмоцыі і асацыяцыі ва ўдзельнікаў і гасцей.
Падкрэсліваецца, што патрэбен
«сімвал, які адлюстроўвае адушаўлёны або неадушаўлёны вобраз, у тым ліку чалавека або жывёлы з пэўнымі характарыстыкамі, адпаведнымі мерапрыемству».
У будучыні гэты вобраз плануюць выкарыстоўваць у выглядзе раставой лялькі, сувенірнай прадукцыі, на падарунках, прэзентацыйных матэрыялах, а таксама ў фота– і відэакантэнце.
Прымаць заяўкі будуць да 31 снежня, пераможцу вызначаць у студзені. Таму, хто пераможа, дадуць каштоўны прыз.
Каментары