Прэмія «Надзея Свабоды» за 2025 год была ўручана галоўнаму рэдактару «Рэгіянальнай газеты» Аляксандру Манцэвічу падчас літоўска-беларускага «Форуму журналістаў балтыйскіх краін і пераследаваных журналістаў» у Сейме Літвы 18 снежня, паведамляе Беларуская асацыяцыя журналістаў.
Аляксандр Манцэвіч — былы палітвязень, які быў затрыманы 15 сакавіка 2023 года падчас ператрусаў у рэгіянальных СМІ і асуджаны на 4 гады калоніі і штраф у памеры 14 800 рублёў за «распаўсюд загадзя хлуслівай інфармацыі». Віну ён не прызнаў. 11 верасня 2025 года Манцэвіч быў вызвалены і прымусова дэпартаваны ў Літву разам з іншымі 9 журналістамі.
У сваёй прамове падчас уручэння прэміі Манцэвіч падзякаваў літоўскім калегам і палітыкам за падтрымку, падкрэсліўшы, што ўзнагарода важная не толькі для яго асабіста, але і для ўсёй беларускай журналісцкай супольнасці, якая працягвае змагацца за свабоду слова. Ён адзначыў, што сапраўдная свабода прыйдзе тады, калі беларусы змогуць жыць дома.
«Рэгіянальная газета», якую Манцэвіч заснаваў у красавіку 1995 года, была адным з першых прыватных СМІ ў Беларусі і доўгі час заставалася вядучым незалежным выданнем у Маладзечне і навакольным рэгіёне.
Прэмія «Надзея Свабоды» ўручаецца ўжо шосты год запар як знак падтрымкі свабоды слова. Летась яе атрымала галоўная рэдактарка сайта «Медыязона. Беларусь» Наста Бойка, у 2023‑м — Ягор Марціновіч, у 2022‑м — Алег Груздзіловіч, у 2021‑м — Андрэй Аляксандраў, а ў 2020‑м — Кацярына Барысевіч, Алена Таўкачова, Таццяна Каравянкова, Кацярына Андрэева і Дар’я Чульцова.
Каментары