У Беларусь завезлі «Чабурашку 2». Паглядзелі гэты расійскі хіт, каб вам не прыйшлося
У кінатэатрах актыўна паказваюць «Чабурашку 2». Стужка пра вушастага супергероя ўжо парвала расійскі пракат, а цяпер няблага збірае і ў Беларусі. Няўжо атрымалася так цікава?
Касматы вушасцік Чабурашка нарадзіўся ў працах савецкага пісьменніка Эдуарда Успенскага. Але некалькі гадоў таму і яго, і іншых герояў сагі пра кракадзіла Гену напаткаў незайздросны лёс.
У 2023‑м расійскія кіношнікі выпусцілі стужку «Чабурашка». Абралі папулярны фармат live-action, калі мульцяшных герояў пераносяць у рэальны свет з дапамогай камп’ютарнай графікі. Памятаеце, напрыклад, стужку «Ліло і Сціч» 2025 года, дзе блакітны Сціч бегаў па гавайскіх прасторах? Вось гэта якраз яно.
Стваральнікі новага «Чабурашкі» адмежаваліся ад арыгінальных герояў Успенскага і створанага па той гісторыі мульта ад «Саюзмультфільма». Казалі, што героі Успенскага іх толькі натхнялі, што яны не экранізуюць апавяданні Успенскага, а выкарыстоўваюць новыя напрацоўкі.
Вядома, яны хітравалі. Чабурашка, кракадзіл Гена, Шапакляк — усё гэта больш чым проста героі з арыгінальнага мульта, гэта вобразы, якія нельга адасобіць ад першапачатковай гісторыі. І таму любыя спробы іх выкарыстаць у новым фармаце непазбежна будуць звязаныя са спробай аднавіць тыя ж цёплыя эмоцыі, якія выклікаў арыгінальны мульт.
У сучаснай франшызе Чабурашка — істота з іспанскіх апельсінавых плантацый, якую ўраганам выносіць на ўзбярэжжа Чорнага мора. Там жыве і працуе пануры садоўнік Гена, персанаж настолькі бурклівы, што часам ледзь не ператвараецца ў кракадзіла.
У дом Гены і прылятае Чабурашка. Мужчына прывязваецца да жывёлы, вучыць яе гаварыць і пакідае жыць у сябе, а на пытанні іншых людзей адказвае, што ў яго з’явілася беларуская вушастая аўчарка. Ёсць у гэтай гісторыі яшчэ адзін знаёмы герой — Рыма, кіраўніца мясцовай шакаладнай фабрыкі, якая вельмі любіць прыгожыя капелюшы. У яе вобразе стваральнікі франшызы схавалі вобраз старой Шапакляк з савецкага мульта.
Дадамо, што правобразам арыгінальнай Шапакляк была першая жонка Эдуарда Успенскага, якую якраз звалі Рыма.
«Чабурашка 2» пачынаецца праз год пасля падзей першай стужкі, дзе Чабурашка і Гена пасябравалі праз агульныя прыгоды.
Цяпер Чабурашка год жыве ў Гены, і, здаецца, усё ў яго добра. Сам Гена таксама не скардзіцца на жыццё і нават чакае ўнука.
Але раптам у ягоны дом прыходзяць незнаёмцы і кажуць, што на месцы той хаты мусіць быць збудаваны забаўляльны парк, таму Гена мае 24 гадзіны на тое, каб сабраць рэчы і перабрацца ў іншае месца. У адчаі мужчына ідзе да Рымы. Высвятляецца, што якраз яе шакаладная фабрыка і будуе той парк, таму Рыма загадвае, каб дом Гены ўсё ж захавалі, а заадно бярэ Чабурашку на дзень нараджэння сваёй дачкі, якая проста ў захапленні ад вушасціка.
Хэпі-энд? Зусім не, бо з гэтага моманту ў фільме пачынаецца проста неапісальнае вар'яцтва. Дачка Рымы незадаволена круціць носам на свяце — маўляў, усё не так. А потым вырашае разам з іншымі дзецьмі адправіцца ў самастойныя прыгоды. Гісторыя з домам аказваецца зусім не закрытай, і ўсё гэта прыводзіць Чабурашку і Гену ў вялікую небяспеку.
Гэты фільм невыносна павольны. Павароты сюжэта вельмі прадказальныя і бяспечныя, таму не чакайце ад стужкі нейкай інтрыгі. Нейкі саспенс з’явіцца толькі ў апошнія 20 хвілін стужкі, але сітуацыю ён не выправіць — кіно застанецца вельмі, вельмі нудным.
І тым не менш на яго павалілі гледачы. У Расіі фільм ужо сабраў больш за 20 мільёнаў еўра, Беларусь не адстае. Стужку паказваюць у шматлікіх беларускіх кінатэатрах, і найлепшыя месцы на паказы раскупліваюць загадзя, хаця і не так актыўна, як гэта адбываецца ў Расіі. Выглядае, што на гэтым стужка не спыніцца, бо яе папярэднік, «Чабурашка», увогуле ўвайшоў у топ-20 самых касавых стужак свету за 2023 год.
Чаму фільм глядзяць? Адказ просты — настальгія і спроба хаця б на паўтары гадзіны ў кіназале апынуцца ў мінулым. Зарабляць на настальгіі ў кіно нармальна, той жа Disney выпускае live-action рымейкі сваіх культавых мультоў, і яны збіраюць касу. Але рабіць на настальгіі цэлую франшызу — сумнеўны крок і для маралі, і для перспектывы, бо рана ці позна прыйдзецца ўсё ж сказаць нешта новае.
Стваральнікі франшызы пра Чабурашку гэта разумеюць, і ў канцы стужкі паказалі невялічкі спойлер. На «Чабурашку 2» усё не скончыцца, і на Новы год-2027 нам абяцаюць трэцюю частку гісторыі, дзе пакажуць радзіму ўсіх чабурашак і, як выглядае, каханую Чабурашкі.
Для навагодняй стужкі пад папкорн гэтага мо і хопіць. Для стужкі, што застанецца ў памяці пакаленняў — дакладна не.
«Наша Нiва» — бастыён беларушчыны
ПАДТРЫМАЦЬ
Каментары