Усяго патроху

Зялёная гарбата падаўжае жыцьцё

Калі выпіваць ня менш за пяць кубкаў у дзень Апошнія высновы навукоўцаў

Японцы выясьнілі, што зялёная гарбата падаўжае жыцьцё. Што праўда, за 11 год экспэрымэнту памёр толькі 1% абсьледаваных, так што праўдзівасьць дадзеных сумнеўная. Што, зрэшты, адносіцца і да другіх «шкодна-карысна-харчовых» дасьледаваньняў. Тым ня менш, падобнага кшталту экспэрымэнты ладзяцца ў кожнай краіне сьвету.

Зялёная гарбата падаўжае жыцьцё, скарачае сьмяротнасьць і гоіць сэрца. Да такіх глыбока навуковых высноваў прыйшлі японскія лекары на чале з Шынічы Керыяма з унівэрсытэцкай школы Тахоку ў Сэндаі, дасьледаваўшы больш як 40 000 мужчын і кабет.

Апублікаванае ў Journal of the American Medical Association 11-гадовае дасьледаваньне выясьніла, што асабліва гаючай зялёная гарбата, якая здаўна асацыюецца з высокай працягласьцю веку японцаў, становіцца ў здарэньні сардэчных захворваньняў. Усяго колькі кубачкаў штодня – і рызыка захварэць на якую-кольвек сардэчна-судзінную хваробу рэзка зьніжаецца.

На дзіва, напой аніяк не ратуе ад раку, як тое ўважалася пасьля шэрагу папярэдніх дасьледаваньняў на жывёлах.

Як мяркуюць аўтары, гаючы эфэкт зялёнае гарбаты зьвязаны з поліфэноламі – расьліннымі рэчывамі, якія дзеюць як антыаксіданты. Але як менавіта дзейнічаюць поліфэнолы – пакуль ніхто ня спраўджваў. Можа, яны запускаюць натуральныя антыакісьляльныя мэханізмы арганізму ці паніжаюць актыўнасьць вольных радыкалаў у целе, што нішчаць вузы. А паводле адной з вэрсіяў, яны нават перашкаджаюць запаленчым працэсам у крывяносных судзінах.

Дасьледаваньне ладзілася з 1994 г. на паўночным усходзе Японіі, у вобласьці, дзе зялёную гарбату спажываюць 80% насельнікаў і больш як 50% выпіваюць ад трох кубкаў штодня. Дасьледавалі людзей у веку ад 40 да 79 год, якія ня мелі інсультаў, раку і хваробаў сэрца.

Тыя, хто штодня каўтаў 5 (паўлітра) і болей кубкаў зялёнае гарбаты, паміралі значна радзей, чым тыя, хто гарбату падабаў не настолькі і выпіваў да аднаго кубку штодня. Паказьнікі сьмяротнасьці, асабліва на сардэчныя захворваньні, сярод аматараў зялёнае гарбаты выявіліся на 16% меней за 11 год. Прычым першыя 7 год гэтая лічба была яшчэ вышэй – 26%.

Кардыялягічны эфэкт яскравей выяўлены ў кабет. Відаць па ўсім, таму, што мужчыны часьцей паляць, мяркуюць аўтары.

Збольшага лік удзельнікаў дасьледаваньня, якія памёрлі на сардэчна-судзінныя захворваньні за справаздачны пэрыяд, увогуле быў скрайне нізкі: менш 1% у кожнай катэгорыі спажываньня гарбаты. Ніякай сувязі паміж іншымі гатункамі гарбаты – перадусім чорнай і ўлунг – і сьмяротнасьцю ня выявілі.

Рак і хваробы сардэчна-судзіннай сыстэмы – дзьве галоўныя прычыны сьмяротнасьці ва ўсім сьвеце, а гарбата ўсіх гатункаў – найбольш распаўсюджаны напой пасьля вады. Японскія дасьледнікі, аднак, ня ведаюць, што параіць сваім суайчыньнікам, якія збольшага і без усялякіх рэкамэндацыяў падабаюць зялёную гарбату і пастаянна яе п’юць.

Зрэшты, японцы не адныя вывучаюць карысьць розных харчовых прадуктаў і напояў. Падобныя паведамленьні зьяўляюцца амаль штодня. Напрыклад, апошнімі днямі мэдыкі пасьпелі параіць замяніць антыбіётыкі на журавінавы сок і есьці мандарыны, каб ахаваць пячонкі.

Цягам першага дасьледаваньня супрацоўнікі Політэхнічнага інстытуту Ўорчэстэра ў ЗША здолелі цалкам расшыфраваць біяхімічныя мэханізмы, што ляжаць у аснове шматлікіх жыватворных якасьцяў соку журавінаў. Яго здольнасьць перацінаць бактэрыяльныя інфэкцыі і, у прыватнасьці, інфэкцыі мочаспускальных шляхоў, вядомая здаўна.

Як выявілася, пад узьдзеяньнем танінаў, што ўтрымліваюцца ў журавінах, бактэрыя кішачнай палачкі E. coli зьмяняе ня толькі форму бізункоў, але і структуру мэмбраны і сваю форму, пераўтвараючыся з палачкі ў кулю. Апроч таго, таніны не даюць E. coli выпрацоўваць рэчыва індол, што ўдзельнічае ў абмене сыгналамі паміж бактэрыямі. У выніку жыцьцяздольнасьць бактэрыяў зьніжаецца, і ім цяжэй праточвацца ў тканкі.

Таму, як мяркуюць дасьледнікі, журавінавы сок хутка мае стаць незаменным, бо лік бактэрыяў, устойлівых да антыбіётыкаў, стала расьце.

А іхныя калегі зь Японіі тым часам высьветлілі, што мандарыны паніжаюць рызыку разьвіцьця рака пячонак, віруснага гепатыту, дыябэту і судзінных захворваньняў амаль на 9%. Гаючыя асаблівасьці гэтай садавіны тлумачаць высокім утрыманьнем каратыну – вітаміну А. Увадначас самі дасьледнікі падкрэсьліваюць, што дасьледавалі вельмі невялікую колькасьць чалавек, і работу таму сьлед працягваць.

Такім парадкам, практычна немагчыма выпрацаваць нейкія агульныя парады ў рацыёне.

Але бадай самым упадабаным аб’ектам такога кшталту дасьледаваньняў ёсьць кава.

Кубачак кавы можа зрабіць чалавека больш падатлівым, а ў некаторых выпадках нават прымусіць яго перайначыць уласнае меркаваньне – так мяркуюць навукоўцы з Кўінзлэндзкага мэдыцынскага ўнівэрсытэту, якія ладзілі дасьледаваньні на 40 добраахвотніках. Чатыры кубкі кавы штодня паніжаюць рызыку цырозу нырак на 80%, а дыябэту – на 22%, мяркуюць амэрыканскія дасьледнікі. Уважаюць, што кава можа справакаваць інфаркт міякарду, аднак ягоная сувязь з падвышэньнем артэрыяльнага ціску – даволі спрэчнае сьцьверджаньне.

Рэч у тым, што кафэін, які ўтрымліваецца ў лістках гарбаты, бабах какавы, насеньні кавы і гарэхах, з мэдычнага гледзішча – клясычны стымулятар. Кава спрыяе таму, што ўзбуджальныя сыгналы звонку дзеюць на арганізм мацней – паскараецца сэрцабіцьце, інтэнсіўна вылучаецца страўнікавы сок, можа распачацца потавыдзяленьне.

Надужываньне любым стымулятарам шкодзіць на здароўе, таму колькасьць патэнцыйных дасьледаваньняў, зьвязаных з кавай, мажліва, бясконцая.

Каментары

 
Націсканне кнопкі «Дадаць каментар» азначае згоду з рэкамендацыямі па абмеркаванні.

Цяпер чытаюць

Заканчваецца тэрмін даўніны па народным пратэсным артыкуле. Больш нікога не пасадзяць? Не, ёсць нюансы9

Заканчваецца тэрмін даўніны па народным пратэсным артыкуле. Больш нікога не пасадзяць? Не, ёсць нюансы

Усе навіны →
Усе навіны

«Мала што ў інтэрнэце пішуць». Выкладчык, якога абвінавацілі ў дамаганнях, працягне працаваць у ансамблі «Белая Русь»15

Як медсястра з Барысава адпачывае амаль без грошай5

Тайвань хоча адарваць сваю эканоміку ад Кітая. Наколькі гэта рэальна?2

Праваабаронцы: Сілавікі масава затрымліваюць беларусаў, што трапілі ў кадры дакументальнага фільму пра пратэсты11

«Мы працуем, каб вызваленні сталі сістэмнымі, а не спарадычнымі». Вячорка адказаў Краўцову13

Беларускія школьнікі стварылі дзіцячы блакпост на мяжы з Украінай. У іх савецкія нашыўкі і медаль «удзельніка СВА»58

Паўторна арыштавалі аднаго з пачынальнікаў беларускамоўнага ЖЖ Івана Марозава. Ён вызваліўся з калоніі вясной 2024

Выхаваны і законапаслухмяны голуб перайшоў дарогу на зялёнае святло ВІДЭА6

«Ганна адказала: «Так!» Віталь Гуркоў зрабіў прапанову рукі і сэрца. Хто ж нявеста?35

больш чытаных навін
больш лайканых навін

Заканчваецца тэрмін даўніны па народным пратэсным артыкуле. Больш нікога не пасадзяць? Не, ёсць нюансы9

Заканчваецца тэрмін даўніны па народным пратэсным артыкуле. Больш нікога не пасадзяць? Не, ёсць нюансы

Галоўнае
Усе навіны →

Заўвага:

 

 

 

 

Закрыць Паведаміць