Расійскі генерал хваліўся жонцы, як катаваў і забіваў украінскіх палонных — адразаў вушы і захоўваў у сябе

Украінскі і рускамоўны расследавальніцкія праекты «Радыё Свабода»: «Схемы» і «Сістэма» апублікавалі матэрыял аб катаваннях над палоннымі УСУ, якімі выхваляўся 49‑гадовы генерал-маёр Раман Дэмурчыеў. Цяпер ён намеснік камандзіра 20‑й агульнавайсковай арміі.

Журналісты атрымалі доступ да асабістай перапіскі Дэмурчыева дзякуючы крыніцы ва ўкраінскім войску. У якім месенджары перапісваўся Дэмурчыеў, не ўдакладняецца. 

Асцярожна, апублікаваная ніжэй інфармацыя можа шакаваць вас

Вывучыўшы атрыманы архіў за 2022‑2024 гады, расследавальнікі высветлілі, што Дэмурчыеў расказваў калегам і сваякам пра катаванні і забойствы ўкраінскіх ваеннапалонных.

Так, 18 кастрычніка 2022 года Дэмурчыеў паведаміў, што «ўзяў апорнік», які штурмаваў тры дні, і ў выніку захапіў у палон чацвярых украінцаў. Пасля гэтага ён даслаў сваёй жонцы фота адрэзаных і счарнелых чалавечых вушэй, падвешаных на металічную трубу. 

Таксама журналісты ўстанавілі, што Дэмурчыеў абмяркоўваў з суразмоўцам, якога падпісаў як «Грэк» (мяркуючы па кантэксце, гэта супрацоўнік вайсковай контрвыведкі на імя Раман), што ў генерала ёсць новы «падарунак» — украінскі ваеннапалонны. 

— У мяне палонны ёсць адзін <…> магу табе яго падарыць. Вунь сядзіць адзін там, у яме <…> Што мне з ім рабіць: утылізаваць ці табе аддаць? — пытаецца генерал контрразведчыка ў кастрычніку 2023 года.

«Грэк» згаджаецца забраць палоннага, але Дэмурчыеў удакладняе:

— У нас часу не было проста катаваць яго, таму інфармацыя палюбоўная… Але ў вас часу дафіга, вы можаце падключыць інструменты розныя, якія прымушаюць чалавека казаць праўду.

Журналісты высветлілі асобу гэтага ваеннапалоннага — ён добраахвотнік з Запарожжа, якому на момант захопу было 40 гадоў. Вайсковец УСУ правёў у палоне год і дзесяць месяцаў. Яго ўтрымлівалі ў СІЗА на Алтаі. Улетку 2025 года мужчыну абмянялі і ён вярнуўся дадому ва Украіну.

Таксама «Грэк» сам адпраўляў палонных Дэмурчыеву з просьбай пазбавіцца ад іх, прычым як-небудзь так, каб ніхто не даведаўся. Так ён пісаў генералу ў жніўні 2023 года:

— Справа ёсць. Сакрэтная, — паведамляе «Грэк». — Ёсць некалькі під***саў (затрыманых з доказамі злачынства на схронах). Рэальныя чальцы рэзідэнтуры… Але пад працэс іх аддаваць нельга. Ёсць прапанова аддаць табе на пару дзён папрацаваць капальнікамі акоп, траншэй… Ну і там іх пакінуць. Назаўжды.

У снежні 2024 года ў перапісцы Дэмурчыева з'яўляецца відэа з дрона з цеплавізарам, на якім расейскія вайскоўцы, былыя зняволеныя, засяклі да смерці трох украінцаў сапёрнымі лапаткамі ўжо пасля таго, як апошнія паднялі рукі і здаліся ў палон.

Вось такі дыялог ёсць у адным з галасавых паведамленняў:

— Ну, я табе дакладваў. Два «зэкі» зайшлі на апорнік, на пазіцыю — тры хахлы. Узялі ў палон і засеклі іх лапаткамі, б*, зверы, на*. Вунь паглядзі, пакаранне сапёрнымі лапаткамі, б*, — кажа Дэмурчыеў.

«Схемы» вызначылі падраздзяленне, у якім служылі гэтыя зэкі — «Чорная мамба» 252‑га мотастралковага палка ў складзе 3‑й дывізіі 20‑й агульнавайсковай арміі РФ. Таксама былі вызначаны і асобы забітых палонных УСУ, аднак яны не прыводзяцца ў матэрыяле. 

Больш за тое, Дэмурчыеў паказаў відэа з забойствам палонных свайму непасрэднаму начальніку-камандуючаму 20‑й арміяй генералу Алегу Міцяеву, які заявіў: 

— Зэкі, якія ўзялі пункт, пасеклі лапаткамі, дай бог выжывуць, да ўзнагароджання падаць абавязкова. Паціху адціскацца, малайчына. <…> Малайцы, душыце, душыце гадаў, б*.

Павялічыць

У 2023 годзе Уладзімір Пуцін прысвоіў Дэмурчыеву званне генерал-маёра. Таксама генерал атрымліваў прэмію «Мы побач. Добрая справа» ад губернатара Маскоўскай вобласці Андрэя Вараб'ёва і ордэн ад кіраўніка Чачні Рамзана Кадырава. Нягледзячы на ўзнагароду ад Кадырава, Дэмурчыеў называў чачэнскіх байцоў у перапісках «сыкунамі і піяршчыкамі», кажучы, што «вынікі паказваюць толькі славяне». 

Журналісты датэлефанаваліся да Дэмурчыева, але пасля таго, як яму задалі пытанне, ён паклаў слухаўку. У Мінабароны РФ на запыт следчых не адказалі.

• 0
• 1
• 0
• 9
• 8
• 4
• 50
• 0