Усё вырашыцца ў другім туры. У Францыі прайшоў першы тур муніцыпальных выбараў
У Францыі выбіраюць мэраў буйных гарадоў. У Парыжы з вялікім адрывам лідзіруе сацыяліст Эманюэль Грэгуар, у Ніцы — кандыдат ад ультраправых, у Гаўры — экс-прэм'ер Эдуар Філіп. Не выключана, што для канчатковай перамогі многім кандыдатам давядзецца заключаць саюзы з ультраправымі ці ўльтралевымі, піша Бі-бі-сі.
Галоўнае фармальнае адрозненне муніцыпальных выбараў гэтага года ад галасавання 2020 года — гэта параўнальна высокая яўка. Шэсць гадоў таму, у разгар пандэміі каранавіруса, на ўчасткі прыйшлі менш за 45% выбаршчыкаў, зараз жа гэты паказчык перавысіў 57%.
Галасаванне праходзіла па прапарцыйнай сістэме. Для траплення ў другі тур партыйнаму спісу неабходна атрымаць як мінімум 10% галасоў.
Найбольш увагі было прыкавана да Парыжа. Мэр сталіцы, сацыялістка Ан Ідальго, не стала вылучацца на трэці тэрмін.
У першым туры першае месца з сур'ёзным адрывам заняў сацыяліст Эмануэль Грэгуар (38,3%). Кандыдат ад правых, экс-міністр юстыцыі Рашыда Даці — на другім месцы з 26% галасоў. У другі тур таксама прайшлі Сафія Шыкіру (ультралевая «Непакораная Францыя», 11,3%), цэнтрыст П'ер-Іў Бурназель (11,2%) і Сара Кнафо, якая з цяжкасцю пераадолела 10% бар'ер (ультраправая «Рэканкіста»).
Лёс выбараў вырашыцца ў другім туры, і кандыдаты больш за ўсё гавораць пра магчымыя кааліцыі. Грэгуар папракнуў сваю саперніцу Даці ў тым, што яна так і не сказала, ці будзе аб'ядноўвацца з ультраправымі. У сваю чаргу, «макраніст» Бурназель гатовы аказваць падтрымку правым толькі ў тым выпадку, калі яны не стануць супрацоўнічаць з нацыяналістамі. Рашыда Даці між тым заявіла, што зараз «не час для расколу» і заклікала да аб'яднання «ўсіх, хто не хоча левых сектантаў ва ўладзе».
У Гаўры са значным адрывам лідзіруе экс-прэм'ер Эдуар Філіп, які ўжо раней заявіў, што прыме ўдзел у прэзідэнцкіх выбарах.
Па апытаннях, у 2027 годзе ў яго больш за ўсё сярод правацэнтрыстаў шанцаў выйсці ў другі тур прэзідэнцкай гонкі.
У першым туры Філіп набраў 43,8% галасоў. Камуніст Жан-Поль Лекок атрымаў 33,2%, ультраправы палітык Франк Келер — 15,3%
У Ніцы, як і чакалася, лідзіруе з 43,2% ультраправы палітык Эрык Сьёці, які заручыўся падтрымкай «Нацыянальнага аб'яднання». Цэнтрыст Крысціян Эстрозі атрымаў 30,3%.
У Нанце разгортваецца барацьба паміж сацыялісткай Жаанай Ралан (35,4%) і Фульком Шамбарам дэ Ло («Рэспубліканцы», 33,8%). «Непакораная Францыя», з якой сацыялісты перад першым турам адмовіліся супрацоўнічаць, правяла свайго кандыдата Вільяма Акана ў другі тур з 11,3%. Ультралевыя ўжо прапанавалі Жаане Ралан стварыць «антыфашысцкі фронт» і аб'яднаць спісы ў другім туры.
У Марсэлі з такой жа прапановай да правых звярнуўся прадстаўнік ультраправага «Нацыянальнага аб'яднання» Франк Алізіо, які заняў другое месца з 34,3%. Лідзіруе пасля першага тура сацыяліст Бенуа Паян (36,8%).
«Аб'яднаемся, каб перамагчы левых і ультралевых», — заявіў Алізіо.
У першым туры ультралевая «Непакораная Францыя» выступіла лепш, чым чакалася. Лідар партыі Жан-Люк Меланшон, з якім адмовіліся супрацоўнічаць сацыялісты з-за яго антысеміцкіх заяў і агрэсіўнай рыторыкі, заявіў, што «Непакораная Францыя» спадзяецца на перамогу ў Ліле і Тулузе, а таксама задаволена вынікамі ў Парыжы, Ліёне і Марсэлі. Ён заклікаў «традыцыйных левых» уступіць у шырокую кааліцыю, каб перамагчы правых і ультраправых. «»Непакорная Францыя» працуе над фармаваннем адзінага фронту для разгрому правых і крайне правых. Працягнутую руку неабходна прыняць», — заявіў Меланшон.
«Нацыянальнае аб'яднанне» таксама задаволена першым турам. Акрамя поспеху ў Марсэлі і Ніцы, ультраправыя дамагліся перавыбрання мэраў, якія прадстаўляюць партыю, у некалькіх гарадах, у тым ліку ў Перпіньяне. Таксама «Нацыянальнаму аб'яднанню» ўдалося атрымаць перамогу адразу ў першым туры ў трох гарадах на поўначы краіны.
Другі тур муніцыпальных выбараў пройдзе ў нядзелю, 22 сакавіка. Гэта апошняе буйнае галасаванне перад прэзідэнцкімі выбарамі 2027 года.
Каментары