Пачалі з паразы

ХК «Дынама-Мінск» прайграў у стартавым матчы Кантынентальнай хакейнай лігі сезона 2010/2011. У чацвер, 9 верасня, падапечныя Марэка Сікоры саступілі ў «Мінск-Арэне» клубу «Тарпеда» (Ніжні Ноўгарад) з лікам 1:3.

Гульня сабрала 10 830 гледачоў.

Склад «Дынама»: Мезін (58:31) — Мойжыш, Падградскі, Глазачоў, Штумпел, Спірыдонаў — Корабаў, Петрашак, Неміроўскі, Плат, Міхалёў — Касцючонак, Пікарайнен, Мялешка, Стась, Дзямагін — Качаткоў, Варламаў, Кулакоў.

Шайбы: 1:3 (0:0, 1:1, 0:2). Плат (35:50, асістэнт Максім Спірыдонаў) — Чарлз Лінгле (28:21, Райн Вэске, Яўген Каралёў), Міхаіл Варнакоў (50:17, Дэні Гру), Максім Патапаў (59:31, Міхаіл Варнакоў).

Штраф: 8 — 12.

Першы перыяд скончыўся безвынікова і тады здалося, што таму, хто першым закіне шайбу, лягчэй будзе стрымаць перавагу. На 29-й хвіліне вызначыўся «ніжагародзец» Чарлз Гру. Праз паўтары хвіліны ў браму Мезіна трапіў яшчэ адзін снарад. «Тарпедаўцы» пераможна ўскінулі рукі, але суддзі пасля доўгіх перамоваў і кансультацый гол адмянілі, справядліва ўгледзеўшы гульню высока ўзнятай клюшкай у атацы.

У мінчанаў з’явіўся шанец псіхалагічна пераламаць хаду паядынку, аднак ні Дзямагін, ні Стась не здолелі прабіць аўстрыйца Бернда Бруклера, хоць госці нейкі час гулялі ў меншасці.

Зраўняў лік на 36-й хвіліне Джэф Плат. У трэцім перядзе ён ледзь не стаў антыгероем матчу, калі атрымаў дзве хвіліны штрафу за напад на галкіпера гасцей, што не валодаў шайбай. Але мінчане адбіліся, хоць паўтары хвіліны адгулялі ўтраіх супраць пяці супернікаў. Праўда, «Тарпеда» закінула шайбу, калі склады зраўняліся — 1:2 (Варнакоў).

Зраўняць лік «Дынама» не ўдалося, нягледзячы на выдаленне ў гасцей за паўтары хвіліны да канца трэцяга перыяду і замену Мезіна на шостага палявога гульца. За 29 секундаў да канца сустрэчы «Тарпеда», адбіваючыся ад мінскага навалу пры раскладзе чатыры на шэсць, на ўдачу выкінула шайбу ад чужых варотаў. Тая адразу ў брамку не трапіла, а стукнулася ў борт, дзе яе падхапіў, апярэдзіўшы беларускіх абаронцаў, Максім Патапаў — 1:3.

Гледачы масава сталі пакідаць трыбуны. «Дынама» сёння шмат губляла шайбу, блыталася ў атаках, каб мець шанц на овертайм.

***

На пасляматчавай прэс-канферэнцыі трэнер «Дынама» Марэк Сікора сказаў, што не пазнаў увечары каманды: раніцай на раскатцы каманда хутка каталася, а вечарам — зусім іншая. «Кепска прайграць першы матч дома пры такой колькасці заўзятараў. Я чакаў лепшага. Раніцай на раскатцы я бачыў адну хуткую каманду, а потым усё гэта некуды дзелася».

Трэнер «Тарпеда» Уладзімір Галубовіч сказаў, што сёння перамагла каманда, якая мела больш жадання.

Наступны матч «Дынама» правядзе ў Мінску супраць яраслаўскага «Лакаматыва». Гульня пройдзе ў суботу, пачатак, а 17-й.

Перад «Дынама» ў гэтым сезоне пастаўлена асноўная задача — трапіць у плей-оф.

• 0
• 0
• 0
• 0
• 0
• 0
• 0
• 0