Міліцыянты паказалі ордэр, падпісаны сьледчым Расолькам, які вядзе справу віцебскіх выбухаў, а ў свой час шукаў Ганчара з Захаранкам.
Вечарам 30 кастрычнiка супрацоўнiкi ААПП Маскоўскага РУУС Берасьця правялi ператрус у памяшканьнi суполкі "Дзедзiч".
Мiлiцыянты патлумачылі, як яны сказалі, “агляд” тым, што праз тэл. "02" невядомы паведамiў, што ў гэтай хаце ідзе бойка, чуваць крыкi. У гэты час у офiсе знаходзiўся толькi Зьмiцер Шыманскi — кiраўнiк берасьцейскай арганiзацыi Партыi БНФ, які на выбарах узначальваў гарадзкі штаб Мілінкевіча.
Увайшоўшы ў памяшканьне, мiлiцыянты пачалi цiкавiцца друкаванай прадукцыяй, якая там знаходзiлася. У вынiку яны забралі 15 заяваў аб уступленьнi ў Партыю БНФ, 500 чыстых блянкаў заяваў, 800 асобнiкаў дакладу камiтэту па правах чалавека ААН аб сытуацыi з правамi чалавека ў РБ. Забраны таксама каля 50 асобнiкаў бюлетэняў "Навiны БНФ", "Моладзь БНФ", "Дзедзiч", па некалькi асобнiкаў iншых выданьняў.
Варта адзначыць, што мiлiцыянты паказалi сп. Шыманскаму пастанову аб правядзеньнi агляду, у якой адсутнiчалi iмя i подпiс пракурора, што павiнен санкцыянаваць агляд памяшканьня.
“Міліцыянты робяць усё, каб мы не маглi працаваць, -- наракае Зьміцер. — Варта забавіцца ў офiсе больш чым на 15 хвiлiн, як прыяжджае патрульная машына”.
Аглядам кiраваў начальнiк ААПП Юры Сьцепусюк. Удзельнічалі ягоныя намесьнiкi Аляксандар Тарасевiч i Аляксей Сямёнаў. За дзеяньнямi сваiх падначаленых, якія “правяралі крыкі”, сачыў ажно намесьнiк начальнiка УУС Берасьцейскага аблвыканкаму Алег Бандарук, паведамляе З.Шыманскі.
У такіх умовах дзейнічаюць дэмакратычныя актывісты. От і разгарні хоць якую дзейнасьць.
А 31 кастрычніка ўжо ў Горадні супрацоўнікі міліцыі і спэцслужбаў уварваліся ў хату Юлі Коцкай, супрацоўніцы прэсавай групы Мілінкевіча. Паводле інфармацыі прэс-службы Мілінкевіча, міліцыянты паказалі ордэр, падпісаны сьледчым Расолькам, які вядзе справу віцебскіх выбухаў, а ў свой час шукаў Ганчара з Захаранкам.
Хату Коцкай узялі ў аблогу яшчэ з 29 кастрычніка. Маніліся ператрэсьці, аднак хата была замкнёная. Міліцыянты паведамілі суседзям, што нібыта быў сыгнал, што з дому вывозяць сьпірт. Пасля гэтага міліцыянты наведалі маці Юліі. Аднак спадарыня адмовілася ехаць адмыкаць хату, пакуль няма санкцыі пракурора. За пару гадзінаў міліцыянты вярнуліся бяз санкцыі, але з новым падазрэньнем: нібыта ў хаце апроч сьпірту фальшуюць дакумэнты. Жанчына зноў адмовілася адмыкаць хату. Так і доўжылася два дні.
29 кастрычніка ў Горадні затрымалі Андрэя Кусельчука, дарадцу Мілінкевіча. Пасадзілі на трое сутак нібыта за нецэнзурную лаянку.
Гэтыя скаардынаваныя дзеяньні выглядаюць “адказам” на прысуджэньне Мілінкевічу прэміі імя Сахарава.
Цяпер чытаюць
Пасярод іранскіх бамбёжак Дубая Кірыл Руды перабраўся з Эміратаў у ЗША: «Рады злучаць кантыненты! Не саромейцеся да мяне звяртацца»3
Каментары