Больш як 90% акцый адкрытага акцыянернага таварыства «Мінпласт» (Мінск) пяройдуць ва ўласнасць грамадзяніна Расійскай Федэрацыі, паведаміла прэс-служба Дзяржкаммаёмасці.
Новы ўладальнік актываў беларускага прадпрыемства мае прапіску ва Уладзівастоку. Ён пагадзіўся набыць пакет з 59.306 акцый (92,2% статутнага фонду) прадпрыемства па пачатковай цане продажу, павялічанай на 5%. Нягледзячы на тое што аб’яўлены на 17 лістапада 2011 года аўкцыён па продажу акцый ААТ «Мінплат», што належаць Беларусі, не адбыўя з-за адсутнасці дзвюх і больш заявак, адзінаму зарэгістраванаму ўдзельніку таргоў было прапанавана набыць акцыі за 2 млрд. 623 млн. 320 тыс. рублёў. Пакупнік абавязаны да 23 лістапада 2011 года кампенсаваць затраты на арганізацыю і правядзенне аўкцыёну ў 1 млн. 166 тыс. 400 рублёў і прадставіць Дзяржаўнаму камітэту па маёмасці Беларусі завераную належным чынам копію плацежнага дакумента, які пацвярджае кампенсацыю затрат на арганізацыю і правядзенне аўкцыёну. Дагавор куплі-продажу пакета акцый ААТ «Мінпласт» павінен быць падпісаны да 7 снежня 2011 года.
ААТ «Мінпласт» створана шляхам прыватызацыі аб’екта рэспубліканскай уласнасці вытворча-навуковага рэспубліканскага ўнітарнага прадпрыемства «Мінпласт» у 2009 годзе. Асноўным відам дзейнасці з’яўляецца вытворчасць шклопластыкавай арматуры, якая выкарыстоўваецца ў будаўніцтве ўзамен традыцыйнай металічнай арматуры. Аб’ём выручкі ад вытворчасці шклопластыкавай арматуры складае 97%. Іншы від дзейнасці, што ажыццяўляецца прадпрыемствам, — тэхналагічнае абслугоўванне і рамонт аўтамабіляў.
Таксама да 7 снежня 2011 года павінен быць падпісаны дагавор куплі 48.487 акцый (24% статутнага фонду) адкрытага акцыянернага таварыства «Пінскі доследна-механічны завод». Заява на ўдзел у абвешчаным на 17 лістапада 2011 года аўкцыёне па продажы акцый названага прадпрыемства была пададзена толькі адным удзельнікам — таварыствам з абмежаванай адказнасцю «Белінвестгандаль» (Брэст).
Пачатковая цана продажу пакета акцый ААТ «Пінскі доследна-механічны завод» склала 2 млрд. 426 млн. 737 тыс. рублёў. Цана продажу, павялічаная на 5%, склала 2 млрд. 548 млн. 73 тыс. рублёў. Пакупнік таксама абавязаны кампенсаваць затраты на арганізацыю і правядзенне аўкцыёну.
Каментары