Найбліжэйшымі днямі ўлады прымуць рашэнне пра ўшчыльненне забудовы ва Уруччы

Найбліжэйшымі днямі мінскія ўлады прымуць рашэнне адносна праблемы ўшчыльнення жылой забудовы ў мікрараёне Уручча-2.

Пра гэта на прэс-канферэнцыі 20 чэрвеня паведаміў старшыня камітэта архітэктуры і горадабудаўніцтва Мінгарвыканкама Аляксандр Пятроў.

Як сцвярджае Пятроў,

пры праектаванні сямі дамоў на пяці выдзеленых участках не былі парушаны нарматывы ні па шчыльнасці насельніцтва, ні па азеляненні. Хутчэй за ўсё, для зніжэння нагрузкі на тэрыторыю будзе пабудаваны на адзін дом менш, сказаў чыноўнік.

«Распрацоўшчыкі праектаў па параметры максімальнай шчыльнасці перавысілі норму, але з улікам рэканструкцыі тэрыторыі яны норму не парушылі. Для таго каб вярнуцца да параметраў без уліку рэканструкцыі, дастаткова прыбраць адзін дом», — падкрэсліў прадстаўнік Мінгарвыканкама.

Разам з тым ён адзначыў: «Я разумею пазіцыю жыхароў мікрараёна, якія не хочуць, каб перад іх дамамі штосьці будавалася, але з іншага — гэта праяўленне нейкага калектыўнага эгаізму».

Паводле слоў кіраўніка камітэта архітэктуры і горадабудаўніцтва, ва Уруччы «някепскія паказчыкі па азеляненні». Забяспечанасць зялёнымі ўчасткамі на аднаго жыхара складае 15,8 квадратнага метра пры норме 9–10. «Калі б пабудавалі ўсе запраектаваныя дамы, там забяспечанасць некалькі паменшылася б — да 13,6 квадратнага метра, але ў любым выпадку гэта вышэй за норму», — адзначыў спецыяліст.

Сёння, паводле слоў Пятрова, «узважваецца рашэнне, як пагасіць гэты шум». «На дом, супраць будаўніцтва якога пратэстуе грамадскасць, ужо створана таварыства дольнікаў, там будуе УКБ Першамайскага раёна. Калі мы гаворым, што дом не будзе будавацца, гэтых дольнікаў трэба кудысьці размяркоўваць і шукаць новыя месцы. Яны разлічвалі на жыллё, уносілі грошы і не вінаватыя, што ўзнікла такая сітуацыя. Пытанне вырашаецца, і я думаю, што яно будзе найбліжэйшым часам вырашана з максімальным улікам інтарэсаў жыхароў, але не з поўным. У гэтай сітуацыі мы ўсіх задаволіць не можам: можа быць пакрыўджаны забудоўшчык, могуць быць пакрыўджаны жыхары», — лічыць кіраўнік камітэта.

Як паведамлялася раней, 6 красавіка кіраўнік Адміністрацыі прэзідэнта Уладзімір Макей даручыў юрыдычнай службе на працягу тыдня правесці ўважлівую праверку законнасці ўшчыльнення забудовы ва Уруччы-2. Такое распараджэнне было дадзена паводле вынікаў сустрэчы Макея з грамадскай актывісткай Валянцінай Малюцінай. Пакуль вынікі праверкі не вядомыя.

Барацьба жыхароў мікрараёна супраць ўшчыльнення забудовы вядзецца ўжо сем гадоў.

• 0
• 0
• 0
• 0
• 0
• 0
• 0
• 0