Улады звальняюць дырэктараў беларускамоўных школаў аднаго за другім.
Канец навучальнага году прынёс скрушныя навіны ня толькі ў Беларускі ліцэй. Пры канцы траўня, перад выпускнымі, адправілі на пэнсію дырэктарку Беларускай славянскай гімназіі (былой школы №36) Гомелю Тацяну Цыганок. З дырэктарам менскай школы №2 (у Серабранцы), віцэ-прэзыдэнтам Таварыства беларускай школы Аляксандрам Сядзякам, абышліся больш культурна. Ён будзе звольнены пасьля іспытаў — з 30 чэрвеня, калі ў яго скончыцца тэрмін кантракту. Фармальна «органы адукацыі» маюць такое права — не працягваць кантракту і не тлумачыць прычын такога ўчынку. Аднак варта задумацца, што А.Сядзяка кіраваў школай з 1994 г. і дагэтуль да яго прэтэнзіяў не было. Можа, прычына ў тым, што ён, як і Ўладзімер Колас, спрабаваў без адміністрацыйнага дазволу ўдзельнічаць увесну ў мясцовых выбарах. Натуральна, што А.Сядзяку, як і ягонага калегу зь ліцэю, не зарэгістравалі нават кандыдатам.
Сытуацыя ў ліцэі застаецца трывожнай. Гвалтам пастаўленую дырэктарку адклікалі на «падвышэньне кваліфікацыі», аднак не назаўжды. Гэта стала вядома на нарадзе, якую 6 чэрвеня з удзелам У.Коласа, Лявона Баршчэўскага ды Ірыны Сідарэнкі правёў намесьнік міністра адукацыі Казімер Фарына. На думку міністэрства, У.Колас ня можа быць кіраўніком ліцэю. Меркаваньне ж пэдкалектыву розьніцца на 180 градусаў.
Улады «ціснуць» на ўстанову і рознымі праверкамі. 5 чэрвеня тут была праверка з санэпідэмстанцыі, 10 чэрвеня пачалася фінансавая праверка, сьледам за ёй Мінадукацыі распачало комплексную праверку дзейнасьці ліцэю.
У свой чарод бацькі ліцэістаў падалі заяўкі на пікетаваньне: пікеты маюць адбывацца штодня з 19 да 26 чэрвеня. На агульным сходзе 6 чэрвеня былі прынятыя звароты да кіраўніка Адміністрацыі прэзыдэнта Ўрала Латыпава і ўласна да Аляксандра Лукашэнкі.
Кіраўніцтва ліцэю гатовае да выхаду навучальнай установы з-пад дзяржаўнай «страхі». «Мы пачыналі як нядзельная школка, арганізаваная з ініцыятывы суполкі ТБМ Савецкага раёну Менску, і толькі пазьней перайшлі ў структуру Мінадукацыі. Мы можам зноў вярнуцца ў статус недзяржаўнай установы», — зазначыў У.Колас на агульным сходзе 6 чэрвеня. Гэтае меркаваньне было выказанае кіраўніком ліцэю і 9 чэрвеня ў адкрытым лісьце да Аляксандра Лукашэнкі.
Для бацькоў ліцэістаў гэты крок пэдкалектыву — такая самая неспадзяванка, як і для кіраўніцтва Мінадукацыі. Ясная рэч, што за навучаньне дзяцей у недзяржаўнай установе давядзецца плаціць. Многія задумваюцца пра тое, ці дазволяць ім сродкі вучыць дзіця ў недзяржаўным ліцэі. «Вядома, толькі бацькоўскіх грошай на дзейнасьць ліцэю ня хопіць, таму мы шукаем фундатараў», — зазначае нагоды У.Колас. Паводле ягоных словаў, адпаведныя перамовы цяпер вядуцца.
Аркадзь Шанскі
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін6
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»1919
Каментары