Класнаму гомельскаму медыяпраекту «Флагшток» трэба фінансавая падтрымка
Пра фінансавыя цяжкасці 27 мая паведаміў гомельскі рэгіянальны медыяпраект «Флагшток», які публікуе шмат эксклюзійнай інфармацыі і рабіў важныя расследаванні. Праз гэта, як адзначаецца, з 1 чэрвеня выданне будзе «вымушана працаваць у абмежаваным рэжыме».
Фота: facebook.com/flagshtok
Рэдакцыя просіць падтрымкі, каб і далей паведамляць «пра ўсе падзеі» ў Гомельскай вобласці. Падкрэсліваецца, што пры пералічэнні сродкаў неабходна ўлічваць персанальныя рызыкі бяспекі.
Кантэнт інтэрнэт-рэсурсаў «Флагштока» быў прызнаны «экстрэмісцкімі матэрыяламі» ў жніўні 2022 года. 26 красавіка таго ж года Камітэт дзяржаўнай бяспекі прызнаў медыя «экстрэмісцкім фарміраваннем».
Рэгіянальны навінны сайт «Флагшток» быў створаны ў 2020 годзе на хвалі паспяховай грамадскай ініцыятывы, што выступіла супраць будаўніцтва ў Гомелі 60-метровага флагштока за паўмільёна даляраў.
Выданне асвятляе рэзанансныя падзеі ў рэгіёне. З 2022 года «Флагшток» публікаваў важную інфармацыю, звязаную з перамяшчэннем па поўдні Беларусі расійскіх войскаў, якія былі задзейнічаныя ва ўзброенай агрэсіі супраць Украіны.
Чытайце таксама:
Працягваецца збор грошай на вакацыі для дзяцей палітвязняў. Але сабрана толькі палова сумы