U Biełarusi zdymajuć novaje prapahandysckaje kino, kab padletki kinulisia pastupać va ŭniviersitet na nastaŭnikaŭ

Čarhovy prajekt «Biełaruśfilma» nazyvajecca «Kłasnaja». Rolu ŭ im znajšli navat dla ministra kultury Rusłana Čarnieckaha.

Iryna Maroz, jakaja hraje hałoŭnuju rolu. Fota: «Nastaŭnickaja hazieta»

Zdymki mastackaj poŭnamietražki ŭžo pačalisia. «Kłasnaja» — heta historyja minčanki, jakaja skončyła piedahahičny ŭniviersitet i pa raźmierkavańni pajechała ŭ ahraharadok pracavać kłasnaj kiraŭnicaj 11 kłasa. Roźnica va ŭzroście ŭ nastaŭnicy z vučniami nievialikaja, tamu jany nie ŭsprymajuć jaje surjozna. Na hetym budzie pabudavana bolšaja častka kanfliktu ŭ filmie.

Na cikavuju akaličnaść źviarnuŭ uvahu telehram-kanał «Śviaŝiennyj Biełavud»: pieršapačatkova film pra škołu pavinien byŭ zdymać režysior Alaksandr Jafremaŭ. U 2023 hodzie na ekrany vyjšaŭ jahony film «List čakańnia». Heta było kino pra biełaruskich miedykaŭ, jakija nie chočuć źjazdžać pracavać na Zachad. Hledačoŭ u kinazał źbirali prymusova — zhaniali studentaŭ-miedykaŭ.

Ale čamuści ŭ vyniku «Kłasnuju» daručyli zdymać inšamu režysioru — Kiryłu Chaleckamu (jon raniej pracavaŭ nad prapahandysckim filmam «Kulturny kod», jaki taksama krucili amal u pustych załach). Małady režysior byŭ pavinien pracavać nad biełaruska-kitajskim prajektam «Na vieki viečnyja». Pryčyny, čamu tak usio źmianiłasia, nie ahučvali. Los ambicyjnaha sumiesnaha kino taksama nieviadomy.

Ciapier ža 24-hadovy Chalecki ŭ intervju raspaviadaje pra «Kłasnuju» i badziora rapartuje: «Svaim filmam my jašče raz uzdymajem sacyjalnaje značeńnie piedahoha, prestyž i aŭtarytet hetaj prafiesii. Kali paśla našaha filma ŭ BDPU budzie anšłah, značyć, my ŭsio zrabili pravilna».

Vyhladaje iranična, što zdymać «škołu ŭ ahraharadku» pačali ŭ staličnaj škole №5. Akramia jaje, zdymki projduć jašče ŭ čatyroch roznych škołach Biełarusi.

Hrać hałoŭnuju rolu davieryli aktrysie Irynie Maroz. Raniej jana zdymałasia ŭ «Liście čakańnia». Znajšłasia praca i dla ministra kultury Rusłana Čarnieckaha. Jamu dali epizadyčnuju rolu — kiraŭnika kamisii pa raźmierkavańni ŭ BDPU.

Režysior Kirył Chalecki śćviardžaje, što vysokaja pasada akcioru-čynoŭniku nijak nie dapamahła: «Nasamreč jon prachodziŭ proby i byŭ zaćvierdžany ŭ roli da pryznačeńnia na hetuju pasadu, tamu pierad nami paŭstała pytańnie, a ci budzie jon uvohule zdymacca. Jon paćvierdziŭ svoj udzieł u filmie. My vielmi čakajem hetaha zdymačnaha dnia, jaki vypadaje na maj. Nam pryjemna, što ministr kultury zdymajecca ŭ našym filmie».

Darečy, uličvajučy aktyŭnaść Čarnieckaha, jaki i ŭ teatry Maksima Horkaha rehularna vychodzić na scenu, i klipy zdymaje, i pra kino nie zabyvaje, cikava, kali jon paśpiavaje pracavać ministram.

Premjera filma pryznačanaja na vierasień 2025 hoda.

Kamientary da artykuła