Premjera kamiedyi ad «Biełaruśfilma»: u hałoŭnaj roli rasiejec, a małady režysior prapanuje vadzić školnikaŭ
Dniami ŭ prakat vyjšaŭ novy film «Biełaruśfilma» — «Kinošniki». Jon pra chłopca Mikałaja, jaki patrapiŭ pa raźmierkavańni na toj samy «Biełaruśfilm» i maryć źniać aŭtarskaje kino. Ale ŭčorašniaha vypusknika adpraŭlajuć pracavać u archiŭ kinastudyi. Chto źniaŭsia ŭ ajčynnaj kamiedyi? I ci płanuje chtości jaje hladzieć?
Prezientacyja «Kinošnikaŭ» adbyłasia bolš za miesiac tamu — film adkryvaŭ Minski mižnarodny kinafiestyval «Listapad». Naŭrad ci možna skazać, što biełaruskaja kamiedyja ŭraziła žury: «Kinošniki» atrymali dypłom «Za ščyraść i žyćciaradasnaść» u naminacyi «Kino maładych» i śpiecyjalny pryz Minharvykankama.
Ale režysior Kirył Chalecki byŭ poŭny aptymizmu. Na adnoj z pres-kanfierencyj jon kazaŭ, što hatovy ŭžo zdymać film-praciah ci navat sieryjał — kali hledačy zachočuć. «Suśviet «Kinošnikaŭ» dazvalaje zrabić prykvieł, praciah i, mahčyma, navat pieratvorycca ŭ sieryjał. My budziem nazirać za rejtynhami i vodhukami. Mahu skazać, što ja ŭžo dumaŭ nad praciaham, tamu kali aŭdytoryja dobra prymie naš pieršy film, my hatovy rabić druhi».
Recenziju na kamiedyju ciažka znajści navat u dziaržaŭnych ŚMI. Voś niekalki faktaŭ, jakija ahučvalisia: scenaryj pierapisvali ažno 12 razoŭ (darečy, scenarystami byli sam Chalecki i rasijanin Kanstancin Bakulin, jaki zvyčajna piša scenaryi dla sieryjałaŭ na TNT), zdymali film 21 dzień i 9 dzion mantavali. U «Kinošnikach» adbyłosia 24 prafiesijnyja debiuty, a kab dadać krychu «zornaści», zaprasili Juryja Stajanava.
Hałoŭnuju rolu vykanaŭ rasiejec Stanisłaŭ Piakarski, jaki dahetul paśpieŭ źniacca ŭ sieryjale «Sieva Kapucyn», dzie jamu dastałasia druhaja hałoŭnaja rola, a taksama adyhraŭ u epizodzie sieryjała cykła «Pra ludziej i pra vajnu». Ź biełaruskich akcioraŭ u «Kinošnikach» možna pabačyć Łalitu Tabarku, Alaksieja Anisienia, Uładzisłava Soładava, Juryja Ćvirko i Ivana Paŭłava.
Darečy, asoba režysiora taksama cikavaja. Kiryłu Chaleckamu 23 hady (jon tolki ŭ minułym hodzie skončyŭ Akademii mastactvaŭ), da «Kinošnikaŭ» źniaŭ karotkamietražnyja karciny «Daroha» i «Adnojčy była Ziamla», trojčy atrymoŭvaŭ premiju śpiecyjalnaha fondu Łukašenki.
Na pytańnie žurnalista «Biełaruskaha času» jak ža tak atrymałasia, što maładomu chłopcu dazvolili źniać poŭny mietr za košt dziaržsrodkaŭ, Kirył adkazaŭ:
«Dumaju, dapamahło, što ŭ Ministerstvie kultury da taho času ŭžo łunała: Kirył Chalecki, Akademija mastactvaŭ, uznaharody. Pierad raźmierkavańniem mnie patelefanavaŭ Uładzimir Michajłavič Karačeŭski, tady hienieralny dyrektar «Biełaruśfilma», prapanavaŭ ekśpierymientalny varyjant — nakiravańnie ŭ novaje padraździaleńnie, studyju maładziožnaha kino, režysioram. Skazaŭ, jość imaviernaść zrabić poŭny mietr.
Dla mianie heta było vielmi klova, tamu što ŭ 22 hady źniać poŭnamietražnaje kino — heta… Ščyra, ja naohuł takich prykładaŭ nie viedaju. I my praktyčna adrazu stali dumać nad scenaryjam. Praz paŭhoda zajaviŭsia na konkurs, i mnie vypaŭ honar zrabić debiutny poŭnamietražny film na zamovu Ministerstva kultury».
Kirył taksama adznačyŭ, što hałoŭnaha hieroja kamiedyi śpisvaŭ ź siabie.
A voś mietady papularyzavać biełaruskaje kino ŭ Chaleckaha, niahledziačy na małady ŭzrost, davoli savieckija. Jon prapanoŭvaje vadzić školnikaŭ kłasami ŭ kinateatry hladzieć ajčynnyja filmy:
«Na moj pohlad, treba mianiać staŭleńnie hledačoŭ da svajho kino. U nas jość załatyja chity, jakija ŭsio viedajuć. A voś kłasiki apošnich hadoŭ my pakul nie sfarmiravali. U hetym sensie mnie simpatyčny dośvied kitajskaha kiniematohrafa. Jon poŭnaściu niezaležny ad usiaho śvietu. Kitajskaje kino hladziać tolki ŭ Kitai, i jano vielmi dobraje akuplajecca. Pačynajuć sa škoły: vučni kłasami raz na tydzień chodziać na ajčynnyja filmy.
Musić, nam brakuje čahości takoha. Kali my pačniom sa školnaj łavy pryvivać luboŭ da svajho kino, pakazvać, što jano sapraŭdy ŭ nas jość, heta stvoryć cikavaść. Ale musić prajści čas».
Pierad vychadam kino ŭ prakat arhanizavali śpiecprahlad dla biełaruskich sielebryciz u kinateatry «Mir». A voś z kamiercyjnymi pakazami, zdajecca, pakul situacyja žałasnaja. Vyhladaje, što niašmat chto na vychadnych płanuje patracić 85 chvilin svajho žyćcia na «Kinošnikaŭ»: na subotu ŭ kinateatr «Aŭrora» pradadzieny adzin kvitok, u «Biełaruś» − 12, «Kamsamolec» − 25, «Kastryčnik» − 5, «Rakieta» − 23. U kinateatry «Pijanier» zapłanavana ažno dva sieansy na dzień, ale pakul nie kuplena nivodnaha kvitka.
Ciapier čytajuć
«My nie viedali Siarhieja Cichanoŭskaha da siońniašniaj pres-kanfierencyi»17
Kamientary