«Kali pozvu adpravili pamyłkova, hramadzianin pavinien heta dakazać». U Homieli ŭ milicyju vyklikajuć tych, chto nie parušaŭ zakon

Siłaviki na Homielščynie rassyłajuć pozvy na prafiłaktyčnyja mierapryjemstvy. Sprabujuć «pierakanać znajści pracu».

Ilustracyjnaje fota milicyi Homiela

Homielskaja milicyja rassyłaje miascovym žycharam pozvy na prafiłaktyčnaje mierapryjemstva. Mnohich takija listy ździŭlajuć, bo nijakaha zakonu jany nie parušali.

Jak patłumačyŭ namieśnik načalnika Savieckaha RAUS Alaksandr Ramanienka, kali takaja pozva pryjšła, to heta značyć, što hramadzianina ŭklučyli ŭ śpis «darmajedaŭ».

«Chutčej za ŭsio, vy trapili ŭ śpisy hramadzian, niezaniatych u ekanomicy (heta značyć, jakija nie majuć aficyjnaj pracy). Meta prafiłaktyčnaha mierapryjemstva — pierakanać vas znajści pracu. Heta robicca jak indyvidualna ŭ kabiniecie ŭčastkovaha inśpiektara, tak i na ahulnych schodach u rajadździele milicyi, — raskazaŭ milicyjant vydańniu «Biełka».

Jon miarkuje, što pozvy mohuć pamyłkova dasyłać tym, chto nasamreč pracuje. Ale pa łohicy pravaachoŭnika, u takim vypadku dakazvać, što milicyja dapuściła pamyłku, pavinien sam hramadzianin. U takim vypadku čałavieku, jaki atrymaŭ pozvu, treba prynieści paćviardžeńnie taho, što jon pracuje, va ŭpraŭleńnie.

«Kali ŭ vas niama pracy, supracoŭniki milicyi hatovyja dapamahčy vam jaje znajści praz haradskoje ŭpraŭleńnie pa pracy, zaniataści i sacyjalnaj abaronie nasielnictva. Jakraz na schodzie, kudy vas zaprašajuć, pra heta taksama budzie iści havorka», — skazaŭ Ramanienka.

Tolki ŭ Savieckim rajonie Homiela žyvuć kala 10 tysiač čałaviek, niezaniatych u ekanomicy. Mnohich ź ich Ramanienka abvinavačvaje ŭ tym, što jany nie chočuć pracavać, viaduć asacyjalny ład žyćcia i žyvuć za košt svajakoŭ.

Kamientary da artykuła