Tramp dasiahnuŭ miežaŭ svajho śvietu fantazij. Kudy jon adpravicca dalej?

Pacisnuŭšy ruku abvinavačanamu ŭ vajennych złačynstvach, Donald Tramp daŭ zrazumieć, što zabojstvy, katavańni i vykradańni va Ukrainie nie majuć značeńnia. U staražytnaści ludzi kazali pra Ultima Thule — mifičnuju ziamlu na Krajniaj Poŭnačy, na krai śvietu. Adpraviŭšysia na Alasku, kab sustrecca z prezidentam Rasii Uładzimiram Pucinym, prezident ZŠA Donald Tramp dasiahnuŭ ułasnaj miažy svajho źniešniepalityčnaha śvietu mar, piša na sajcie Project Syndicate viadomy historyk Cimaci Snajder.

Uładzimir Pucin i Donald Tramp padčas sustrečy na Alascy 15 žniŭnia. Fota: Andrew Harnik/Getty Images

Dla Trampa zamiežnyja lidary — heta tyja samyja amierykancy, ź jakimi možna abychodzicca z dapamohaj fantastyčnych abiacańniaŭ i brutalnaha ckavańnia. Ale fantazii nie pracujuć za miežami Amieryki.

Pustaja prapanova «cudoŭnaj» budučyni nie kranaje dyktataraŭ, jakija ździajśniajuć złačynstvy dziela ŭłasnych bačańniaŭ, i nie ŭpłyvaje na ludziej, jakija abaraniajuć svaje siemji ad złačynnaha ŭvarvańnia, jakoje kradzie ich ziamlu i bahaćci, vykradaje ich dziaciej, katuje i zabivaje mirnych žycharoŭ.

U Pucina niama pryčyn addavać pieravahu bačańniu «vydatnaj budučyni» ad Trampa zamiest ułasnaha: Ukraina z maryjanietkavym uradam, nasielnictva, zahnanaje ŭ padparadkavańnie hvałtam, patryjoty ŭ masavych pachavańniach i resursy ŭ rasijskich rukach. Jak i fantazii Trampa, jaho zapałochvańnie taksama nie dziejničaje za hetaj miažoj.

Niesumnienna, mnohija amierykancy bajacca Trampa. Jon začyściŭ ułasnuju partyju, a pahrozy hvałtam dapamahajuć utrymlivać kanhresmienaŭ-respublikancaŭ u padparadkavańni. Jon vykarystoŭvaje amierykanskuju armiju ŭ jakaści palicyi — spačatku ŭ Kalifornii, a ciapier i ŭ Vašynhtonie.

Ale zamiežnyja vorahi ŭsprymajuć hetyja mietady inakš. Toje, što šakuje amierykancaŭ, raduje vorahaŭ Amieryki. Bo ŭ Maskvie razhortvańnie vojskaŭ unutry ZŠA vyhladaje jak słabaść. Ćviordyja razmovy mohuć znajści vodhuk u Amierycy, dzie my časta błytajem ich ź dziejańniami. Ale dla rasijskich lidaraŭ jany tolki zasłaniajuć słabuju zamiežnuju palityku.

Tramp zrabiŭ nadzvyčajnyja sastupki Rasii ŭ abmien na ništo. U adkaz Pucin praciahvaje vajnu suprać Ukrainy i kpić ź jaho na padkantrolnym dziaržavie telebačańni.

U čym zaklučajucca hetyja sastupki? Samym tolki faktam sustrečy z Pucinym na Alascy Tramp spyniŭ bolš za trochhadovuju dypłamatyčnuju izalacyju Kramla z boku Zachadu. Pacisnuŭšy ruku abvinavačanamu ŭ vajennych złačynstvach, Tramp daŭ zrazumieć, što zabojstvy, katavańni i vykradańni va Ukrainie nie majuć značeńnia.

Navat vybar Alaski byŭ sastupkaj — i dziŭnaj. Rasijanie, uklučajučy klučavyja fihury dziaržaŭnych ŚMI, rehularna zajaŭlajuć pra pretenzii na Alasku. Zaprasić ludziej, jakija zajaŭlajuć pretenzii na vašy terytoryi, na hałoŭnuju vajskovuju bazu na hetaj terytoryi dla abmierkavańnia vajny, jakuju jany sami pačali, nie zaprasiŭšy pry hetym nikoha z krainy, jakaja źjaŭlajecca achviaraj uvarvańnia — heta amal kraj źniešniepalityčnaj fantazii.

Heta i jość Ultima Thule. Heta byŭ sapraŭdny finał, bo da taho Tramp užo sastupiŭ u bolš fundamientalnych pytańniach. Jon nie havoryć pra spraviadlivy sud dla rasijskich vajennych złačyncaŭ ci pra reparacyi, jakija pavinna Rasija. Jon zhadžajecca, što Rasija moža vyznačać zamiežnuju palityku Ukrainy i ZŠA ŭ klučavym pytańni siabroŭstva ŭ NATA. I jon prymaje, što rasijskija ŭvarvańni pavinny pryvodzić nie tolki da faktyčnych, ale i da jurydyčnych źmienaŭ suvierennaha kantrolu nad terytoryjami.

Pryniaćcie taho, što ŭvarvańnie moža zakonna źmianić miežy, razburaje suśvietny paradak. Nadańnie Rasii prava vyznačać źniešniuju palityku inšych krain stymuluje novuju ahresiju. Admova ad vidavočnych jurydyčnych i histaryčnych adkazaŭ na złačynnyja vajennyja ahresii — reparacyj i trybunałaŭ — zaachvočvaje vojny ŭ cełym.

Tramp hučna havoryć i trymaje maleńkuju pałku. Ujaŭleńnie, što adnych tolki słoŭ dastatkova, pryviało jaho da pazicyi, što słovy Pucina majuć značeńnie, a tamu jon pajechaŭ na Alasku dla «słuchańnia».

Usia palityčnaja karjera Trampa składajecca z vysłuchoŭvańnia Pucina i paŭtareńnia jaho tezisaŭ. Abodva hetyja čałavieki nakiroŭvajucca žadańniem vieličy ŭ budučyni. Pucin ličyć, što jaje možna dasiahnuć vajnoj, častkaj jakoj źjaŭlajecca manipulavańnie prezidentam ZŠA. Zamiest hetaha Tramp ličyć, što jaho spadčyna moža być zabiaśpiečanaja asacyjacyjaj ź miram, ale pakul jon nie hatovy raspracavać svaju ŭłasnuju palityku, jon stanovicca zakładnikam taho, chto raźviazaŭ vajnu.

Pucina nie cikavić kaniec vajny, kali jahonuju ŭłasnuju prapahandu paŭtaraje prezident ZŠA. Jaho nie pryciahvaje i abstraktnaja karcina lepšaha śvietu, tamu što jon maje na ŭvazie ŭłasnuju kankretnuju žorstkuju metu.

Na Alascy Tramp dasiahnuŭ svajoj asabistaj Ultima Thule — miežaŭ svajho čaroŭnaha śvietu słoŭ. Pierad im paŭstała prostaje pytańnie: ci prymie Pucin biezumoŭnaje spynieńnie ahniu, jak taho patrabavaŭ Tramp? Pucin admoviŭsia i zrabiŭ heta znoŭ ža na Alascy.

Zamiest hetaha rasijanie vystavili adkryta absurdnuju i pravakacyjnuju kontrprapanovu: Ukraina pavinna aficyjna sastupić Rasii terytoryi, jakija Rasija navat nie akupavała, ziemli, dzie Ukraina ŭžo vybudavała abaronu. A tady Rasija, viadoma, zmoža atakavać sa značna bolš vyhadnych pazicyj.

Pucin viedaje, jak Tramp prahnie Nobieleŭskaj premii miru. Tamu jaho vidavočny chod — namiakać Trampu, što vajna kali-niebudź zavieršycca i Tramp atrymaje łaŭry, kali jany abodva buduć i dalej havaryć. «Nastupnym razam u Maskvie?» — spytaŭ Pucin pierad adlotam z Alaski, pakul Rasija praciahvaje bambardziroŭki.

Ciapier, kali Tramp nie zdoleŭ damahčysia biezumoŭnaha spynieńnia ahniu, pierad im zastajucca tolki dva šlachi. Jon moža praciahvać žyć u iluzii, ale ŭsio bolš vidavočnym stanovicca navat jaho siabram i prychilnikam: hetaja fantazija — pucinskaja. Ale jon moža zrabić vajnu dla Pucina ciažejšaj, i tym samym nablizić jaje kaniec.

ZŠA jašče nie zamacavali svaich nievierahodnych sastupak Rasii jurydyčna, i Tramp moža adklikać ich na adnoj-adzinaj pres-kanfierencyi. ZŠA majuć instrumienty palityki, zdolnyja źmianić chod vajny va Ukrainie, i mohuć ź ich skarystacca.

Tramp pahražaŭ «surovymi nastupstvami», kali Pucin nie pahodzicca na biezumoŭnaje spynieńnie ahniu. Ale heta byli tolki słovy, i dahetul nastupstvami hetych słoŭ dla Rasii byli… inšyja słovy.

Ciapier, na Ultima Thule, usio stała vidavočnym. Tramp dasiahnuŭ miežaŭ svajho śvietu fantazij. Kudy jon adpravicca dalej?

Kamientary da artykuła