U śviecie dva dziasiatki karanavanych abrazoŭ. Try ź ich znachodziacca ŭ Biełarusi.
28 žniŭnia ŭ Horadni, la bernardynskaha kaściołu, adbyłasia karanacyja abraza Maci Božaj Kanhrehackaj. U hety ž dzień adznačałasia taksama 300-hodździe Farnaha kaściołu. Na śviata prybyli nia tolki hierarchi katalickaj carkvy Biełarusi na čale z kardynałam Kazimieram Śviontkam, ale j hości. Z Maskvy pryjechaŭ pastyr rasiejskich katalikoŭ karenny haradzieniec arcybiskup Tadevuš Kandrusievič.
Śvieckuju ŭładu pradstaŭlali kiraŭnik Haradzienskaj vobłaści Ŭładzimier Saŭčanka, staršynia Kamitetu ŭ spravach relihijaŭ i nacyjanalnaściaŭ pry Saŭminie Stanisłaŭ Buko.
Pazałočanuju srebnuju karonu dla abraza zrabiŭ mastak-restaŭratar Uładzimier Kisły. «Uskładańnie karony nie źmianiaje ničoha na niebie. Heta naš znak pašany da hetaha abraza: my śviedčym svaju pavahu da ździejśnienych im cudaŭ», — patłumačyŭ adzin z ksiandzoŭ, što prysutničali na karanacyi. Viadoma 120 cudaŭ, ździejśnienych hetym nievialikim (18ch22 sm) abrazom.
Haradzienskaja vyjava Maci Božaj Kanhrehackaj — treci z karanavanych abrazoŭ u Biełarusi. Pieršy — u Łahišynie pad Pinskam, druhi — u Budsłavie. Ahułam ža ŭ śviecie karanavanych katalickich abrazoŭ usiaho kala dvuch dziasiatkaŭ.
Ikona, jakaja znachodzicca ŭ haradzienskim farnym kaściole z 1666 h., viadomaja va ŭsim śviecie jak abraz Maci Božaj Śniežnaj: jon źjaviŭsia ŭ chramie Santa Maryja Madžore ŭ Rymie na Eskvilinskim pahorku, jaki ŭ žnivieńskuju śpioku 352 h. zasypała śnieham. Aśviečanyja kopii cudatvornaha abraza razychodzilisia pa ŭsioj Eŭropie. Adnak tolki haradzienskaja vyjava maje nazvu Maci Božaj Kanhrehackaj.
Abraz źjaviŭsia na Haradzienščynie na pačatku XVII st. praz daminikanaŭ, źmianiŭ niekalki ŭładalnikaŭ. A ŭ 1666 h. patrapiŭ studentam haradzienskaha jezuickaha kalehijumu. Studenckaja supołka (kanhrehacyja) u tym samym hodzie padaravała abraz novazbudavanamu tady jezuickamu kaściołu. Tak abraz atrymaŭ epitet «kanhrehacki». Sam kaścioł nia byŭ tady aśviačony: hetaja padzieja adbyłasia tolki ŭ 1705 h. u prysutnaści karala Aŭhusta II i rasiejskaha cara Piatra I.
Da 300-hodździa aśviačeńnia i prymierkavali abrad karanacyi abraza Maci Božaj Kanhrehackaj, choć Papa Jan Pavał II daŭ dazvoł na heta jašče ŭ 2003 h. Sioleta novy pantyfik Benedykt XVI błasłaviŭ usich udzielnikaŭ uračystaj cyrymonii j pavinšavaŭ viernikaŭ ź jubilejem aśviačeńnia kaściołu.
Niby dałučyŭšysia da śviata, na chmarnym ad samaj ranicy niebie zabliščeła sonca paśla taho, jak kardynał Śviontak zamacavaŭ na abrazie karonu. Ci nia samaj pračułaj była pramova arcybiskupa Kandrusieviča. Zhadaŭšy haradzienskuju maładość, arcybiskup raspavioŭ: «Jašče kali ja byŭ małady, to atrymaŭ paradu: kali chočaš dobra vučycca, malisia hetamu abrazu». I niezdarma: da Maci Božaj Kanhrehackaj i ciapier pierad kožnaj sesijaj prychodziać bahata studentaŭ. Nahadaŭ Tadevuš Kandrusievič i pra sam kult Maci Božaj, jaki ŭ jašče nia tak daŭnija savieckija časy byŭ «katakombnym»: «Jana Maci Kaściołu i ŭsiaho adkuplenaha čałaviectva». Darma što ŭžo kolki hadoŭ arcybiskup žyvie ŭ Rasiei, jahonaja biełaruskaja ani nie paciarpieła: pramova hučała čysta i sakavita.
Na cyrymoniju sabrałosia kala dziesiaci tysiačaŭ viernikaŭ z usioj dyjacezii. Spadarynia Felicyja pryjšła na mylicach — niezadoŭha da taho złamała nahu. Sama jana parafijanka inšaha kaściołu, ale heta nie nahoda, kab praminuć śviata: «A jak ža inačaj! Jak pravilna skazaŭ Kandrusievič, biaz Boha — nie da paroha...»
Kamientary