Sprava daktaroŭ: farmakampanii padkuplajuć biełaruskich miedykaŭ?

— Z pačatku hoda bolš za 150 lekaraŭ trapili na razmovy ŭ Hienieralnuju prakuraturu krainy, — raspavioŭ «Narodnaj voli» adzin z «dapytanych» miedykaŭ. I nazvaŭ proźviščy vielmi viadomych kardyjołahaŭ, ankołahaŭ, transpłantołahaŭ.

Pa słovach našaha surazmoŭcy, padstavaj dla takich razmoŭ pasłužyła rasśledavańnie Jeŭrapiejskaha antymanapolnaha kamiteta.

Čatyrom farmakałahičnym kampanijam było vyniesiena papiaredžańnie za toje, što ŭ svajoj dziejnaści na terytoryi Biełarusi jany vykarystoŭvajuć niesumlennyja mietady, pracujuć pa karupcyjnych schiemach, faktyčna padkuplajuć čynoŭnikaŭ ad miedycyny, zahadčykaŭ kafiedrami, śpiecyjalistaŭ, jakija mohuć paŭpłyvać na rašeńnie ab dziaržzakupkach lekavych srodkaŭ. U asnoŭnym darahich imunasupresaraŭ, cytastatykaŭ, inšych procipuchlinnych preparataŭ, košt adnaho pakunka niekatorych takich preparataŭ dasiahaje tysiačy dalaraŭ. Uzamien łabiravańnia svaich intaresaŭ lekaram farmakampanii prapłačvajuć udzieł u roznych mižnarodnych forumach i navukovych kanfierencyjach, sielać našych śpiecyjalistaŭ u darahija hateli, uładkoŭvajuć im ekskursii i inšyja kulturnyja mierapryjemstvy. U vyniku «takoha supracoŭnictva» ŭ 2012-m na zakupku impartnych lekavych preparataŭ, što prymianiajucca ŭ dziaržaŭnaj achovie zdaroŭja, było vydzielena amal na 3 młn dalaraŭ bolš, čym u 2011 hodzie.

Pa nieaficyjnaj infarmacyi, kampanijam pahražajuć bujnyja hrašovyja štrafy, niekatorym firmam pryjšłosia navat źmianić kiraŭnikoŭ svaich pradstaŭnictvaŭ u Biełarusi. Što da miedykaŭ, to ich «spravaj» zaniałasia Hienprakuratura krainy, jakaja ŭ svaju čarhu praviała manitorynh ŭ miedycynskaj halinie na pradmiet karupcyi.

Pakul śledčyja prakuratury viaduć hutarki z daktarami, navukoŭcami-miedykami.

I nie vyklučana, što ŭ dačynieńni da mnohich ź ich mohuć prymianić art. 21 Zakona «Ab baraćbie z karupcyjaj», u jakim pieraličvajucca pravaparušeńni, pryraŭnavanyja da karupcyi, u pryvatnaści, pryniaćcie dziaržaŭnaj słužbovaj abo pryraŭnanaj da jaho asoby «padarunkaŭ abo inšaj vyhady ŭ vyhladzie pasłuhi u suviazi z vykanańniem słužbovych (pracoŭnych) abaviazkaŭ». A heta ŭžo — kryminalnyja spravy, naprykład, pa artykule «atrymańnie niezakonnaha ŭznaharodžańnia rabotnikami dziaržaŭnaha orhana abo inšaj dziaržaŭnaj arhanizacyi». I sankcyi pa takim artykule praduhledžany surjoznyja, maksimalnaja — abmiežavańnie voli na termin da troch hadoŭ abo pazbaŭleńnie voli na toj ža termin.

U Hienprakuratury ad kamientaroŭ pa dadzienaj praviercy ustrymlivajucca.

— Hienieralnaja prakuratura manitoryć usie ministerstvy na pradmiet karupcyi i Ministerstva achovy zdaroŭja ŭ tym liku, — zajavili ŭ pres-słužbie viedamstva. — Pravierka była. Ale heta ŭnutranaja infarmacyja, kamientaroŭ pakul nie dajem.

Miedyki, ź jakimi pravodzili hutarki ŭ Hienprakuratury, taksama nie chočuć ahałoski dadzienaj situacyi.

Pa niekatoraj infarmacyi, dadzienaja pravierka skončyłasia novaj pastanovaj Ministerstva achovy zdaroŭja «dla słužbovaha karystańnia», jakaja zabaraniaje śpiecyjalistam, jakija ŭdzielničajuć u praviadzieńni raznastajnych tenderaŭ, dziaržaŭnych zakupkach, udzielničać u sponsarskich pajezdkach. A heta, jak praviła, hałoŭnyja śpiecyjalisty Minachovy zdaroŭja, hałoŭnyja ŭračy klinik, zahadčyki adździaleńniaŭ i kafiedrami, niaredka miedyki ź imionami, lepšyja pradstaŭniki roznych śfier miedycyny. Biezumoŭna, padobnaja zabarona — lepš, čym kryminalnaja sprava ab karupcyi. Ale…

— Va ŭsim śviecie farmakampanii dapamahajuć arhanizataram raznastajnych miedycynskich kanhresaŭ, — padzialiŭsia svaim mierkavańniem naš surazmoŭca. — Jany dapamahajuć uračam udzielničać u takich mierapryjemstvach.

Kampanii ŭkładajuć hrošy ŭ navukovyja raspracoŭki. A dzie navukoŭcy mohuć dzialicca svaim vopytam? Na mižnarodnych kanhresach. Časta infarmacyja, jakaja hučyć u dakładach na navukovych kanhresach, nidzie nie publikujecca, šyrokaj ahałoscy addajecca praz hady. I kali biełaruskija śpiecyjalisty nie zmohuć prymać udzieł u takich źjezdach, to i nie buduć viedać pra novaŭviadzieńni ŭ miedycynie. Jak praviła, Ministerstva achovy zdaroŭja nie maje srodkaŭ, kab finansavać udzieł našych śpiecyjalistaŭ u takich kanhresach. Heta darahija mierapryjemstvy, tolki rehistracyjny ŭniosak na niekatoryja miedycynskija forumy moža dasiahać niekalkich socień jeŭra. Ale inšaja sprava, kali hetyja kamandziroŭki stanoviacca padobnymi na turystyčnyja tury, kali farmakampanija «biare ŭ abarot» i zaachvočvaje čynoŭnikaŭ ad miedycyny i lekaraŭ-administrataraŭ, a ŭ vyniku zakuplajucca leki, anałahi jakich, što vyrablajucca inšymi farmaceŭtyčnymi kampanijami, tańniej i nie mienš efiektyŭnyja. Straty niasie i biudžet, i pacyjenty, jakich pa sutnaści pazbaŭlajuć vybaru čym lačycca.

Što i kazać, prablema isnuje. I adnoj «pasadkaj za kraty» dziasiatka-druhoha daktaroŭ jaje nie vyrašyš. Patrebien dziaržaŭny padychod.

• 0
• 0
• 0
• 0
• 0
• 0
• 0
• 0