Biełarusy masava pačnuć mianiać hramadzianstva na rasijskaje ŭ vypadku admieny vizaŭ pamiž ES i RF?

U vypadku, kali Rasija i Jeŭrasajuz admieniać vizavy režym, biełaruskim uładam treba čakać masavaha pierachodu biełarusaŭ u hramadzianstva RF. Da hetaha viadzie i źmianieńnie rasijskaha zakona «Ab hramadzianstvie», jakija sprościć atrymańnie rasijskaha hramadzianstva dla žycharaŭ SND. Takuju dumku vykazaŭ ekśpiert Biełaruskaha instytuta stratehičnych daśledvańniaŭ (BISS) Andrej Jelisiejeŭ padčas prezientacyi daśledavańnia ab nastupstvach pryniaćcia rašeńnia ab readmisii pamiž Biełaruśsiu i ES,

Pavodle ekśpierta, mahčymaja masavaja mihracyja — adna z padstavaŭ dla ŭładaŭ nie ciahnuć z pahadnieńniem ab readmisii (viartańni nielehalnych mihrantaŭ), jakoje jość nieabchodnym krokam dla spraščeńnia vizavaha režymu.

«Biełaruś, jakaja źjaŭlajecca suśvietnym lidaram pa kolkaści šenhienskich vizaŭ na dušu nasielnictva, taksama jość i aŭtsajdaram u płanie spraščeńnia vizavaha režymu siarod krain Uschodniaha partniorstva. Našyja ŭłady dahetul nie zrabili nijakich ruchaŭ da abmierkavańnia i padpisańnia pahadnieńnia ab spraščeńni vizavaha režymu i readmisii, — paviedamiŭ Jelisiejeŭ. — Ułady prykryvajucca stracham pierad dziasiatkami tysiač nielehalnych mihrantaŭ, jakich nibyta adrazu ž pryšluć na našu terytoryju ź ES. Adnak statystyka nie paćviardžaje hetaha».

Sapraŭdy, kolkaść asobaŭ, jakija sprabavali nielehalna pierasiekčy biełaruska-polskuju i biełaruska-litoŭskuju miažu ŭ 2012 hodzie, składała mienš za tysiaču čałaviek. Padobnyja dadzienyja pastupajuć i z Ukrainy, jakaja ŭžo padpisała damovu ab spraščeńni vizavaha režymu i readmisii. Pavodle źviestak Jeŭrasajuza, tolki 0,7% mihrantaŭ vybirajuć Biełaruś dla pierasiačeńnia miažy ź ES.

Adnak pieršy daradca Pradstaŭnictva ES u Biełarusi Rudolf Ryšar, choć i zhodny, što vizavy režym pamiž ES i Biełaruśsiu škodzić raźvićciu biznesu i hramadstva, skieptyčna stavicca da vysnovy ab mahčymaści masavaha pierachodu biełarusaŭ u rasijskaje hramadzianstva dziela vizaŭ.

«Adzinki mohuć pasprabavać takuju schiemu. Adnak masavaj jana naŭrad ci stanie.

Udzielniki dyskusii, siarod jaki byli i biznesoŭcy, i hramadskija aktyvisty, u roŭnaj stupieni krytykavali jak vizavuju palityku biełaruskich uładaŭ, tak i vizavy kodeks ES. Adnak, na žal, adkazu na pytańnie «Jak razarvać zamknionaje koła?» nie prahučała. Jelisiejeŭ paraiŭ biznesu skłaści kalektyŭny zvarot da ŭładaŭ, a ES — prapanavać uładam Biełarusi bolš «piernikaŭ» dla stymulacyi cikaŭnaści da pahadnieńnia ad readmisii. Naprykład, abiacać pavieličeńnie finansavańnia pamiežnych vojskaŭ u vypadku padpisańnia pahadnieńnia.

• 0
• 0
• 0
• 0
• 0
• 0
• 0
• 0