Na arhanizatara prytułku dla biazdomnych zaviali kryminałku za «niezarehistravanaje hramadskaje abjadnańnie»
Takoha naŭmysna nie prydumaješ. U vioscy Alaksandraŭka Ščučynskaha rajona miascovy viernik Alaksiej Ščadroŭ adkryŭ dom miłasernaści dla «pakinutych i abiazdolenych». Adnak suprać jaho raspačali kryminalnuju spravu pa artykule 193.1 KK «Niezakonnyja arhanizacyja dziejnaści hramadskaha abjadnańnia, relihijnaj arhanizacyi abo fondu albo ŭdzieł u ich dziejnaści».
Artykuł praduhledžvaje pakarańnie ŭ vyhladzie štrafu, aryštu terminam da šaści miesiacaŭ ci pazbaŭleńnieja voli na termin da dvuch hadoŭ.
Sam Ščadroŭ kaža, što jon prosta dapamahaje ludziam, da jakich niama spravy dziaržavie:«My adkryli pieršy dom miłasernaści 1 śniežnia 2011 hoda. Zatym dla patrebaŭ doma miłasernaści my nabyli jašče dva budynki ŭ Alaksandraŭcy — nam ich sastupili tanna, za 500 dy 700 dalaraŭ».
Ad taho času ŭ domie miłasernaści pabyvała 97 čałaviek.Pavodle słovaŭ Ščadrova, siudy prychodziać nie tolki biazdomnyja. Prachodziać reabilitacyju i tyja, chto niadaŭna vyzvaliŭsia z turmaŭ. Pryjazdžajuć navat ludzi, u jakich uźnikli składanaści ŭ siamji… Zvyčajna ludzi pravodziać u domie miłasernaści niekalki miesiacaŭ, a potym chtości znachodzić pracu, chtości viartajecca ŭ siamju. Jość i tyja, chto, pierazimavaŭšy, viartajecca da raniejšaha ładu žyćcia.
«Była, naprykład, žančyna ź dziciom, — raskazvaje spadar Alaksiej. — Jana hrukałasia ŭ manastyry, ale joj admaŭlali ŭ dapamozie. Pryjšła ŭ dom miłasernaści — my jaje nakarmili, dapamahli z adździeńniem. Jana skazała «dziakuj» i pajšła dalej. Ciapier u nas žyvie čałaviek, jaki pryjechaŭ z Vaŭkavyskaha reabilitacyjnaha centra — tam jon znachodziŭsia paśla vyzvaleńnia z turmy. Jon kaža, što źjechaŭ adtul, bo tam režym, što ŭ toj turmie. A z Alaksandraŭki źjazdžać nie choča — padabajecca jamu tut».
Ščadroŭ kaža, što
ludzi prachodziać reabilitacyju z dapamohaj pracy i malitvy. U doma miłasernaści jość svaja haspadarka: harody, kury, kozy, śvińni. Dapamahajuć domu miłasernaści vierniki roznych kanfiesij.«Z ramontam damoŭ dapamoh miascovy fiermier. Jon i pradukty pryvozić časta», — kaža Ščadroŭ.
«Dla malitvaŭ my zładzili nievialikuju kaplicu imia maci Terezy. U joj słužbu pravodziŭ hrodzienski ksiondz Alaksandr Šemiet. I ja bačyŭ, jak ludzi mianiajucca ŭ lepšy bok, jak jany adkryvajucca Bohu».
Adnak mienavita relihijny kampanient dziejnaści doma miłasernaści, jak śćviardžaje Ščadroŭ, staŭ daminantaj u spravie suprać jaho.
«Čynoŭniki viedali pra dom miłasernaści. Upieršyniu pryjechali 10 śniežnia 2011 hoda. Tam byli i sa ščučynskaj milicyi, i ź sielsavieta. Kazali, što treba rehistravać abjadnańnie. Ale ja adkazaŭ, što nie budu ź imi svarycca, a budu dalej malicca Bohu dy dapamahać ludziam.
Ale praź niejki čas, užo paśla stvareńnia kaplicy, adzin z žycharoŭ doma miłasernaści raskazaŭ milicyi, što ŭ prytułku «molacca».Tady ŭžo pryjechali ludzi z KDB, pryjechaŭ prakuror, Ihar Papoŭ z adździeła pa spravach relihij i nacyjanalnaściaŭ Haradzienskaha abłvykankama.
Tady kanfiskavali ŭsiu našu litaraturu, u tym liku Biblii. Vazili ich na ekśpiertyzu ŭ Hrodna, zatym u Minsk. Ničoha nielehalnaha nie znajšli, adnak pa miascovym telebačańni i radyjo pakazali, nibyta ŭ vioscy Alaksandraŭka vykryli i razahnali destruktyŭnuju siektu.
Praz hetu situacyju my stracili našaha śviatara. Papoŭ maje na ksiandza Alaksandra Šemieta zub, bo toj u 2006 hodzie ŭ Hrodna zładziŭ haładoŭku pratestu — ułady nie dazvalali pabudavać kaścioł. Tamu Papoŭ pajšoŭ da biskupa, i biskup u lutym hetaha hoda zabaraniŭ Šemietu pravodzić u nas słužby. Ciapier biskup kaža, što dazvolić śviataram u nas ładzić nabaženstvy, tolki kali aficyjna zarehistrujem relihijnuju supołku. Taksama skazali nam da taho času kaplicu pieratvaryć iznoŭ u spalny pakoj», — kaža Ščadroŭ.
Pakul kryminalnaja sprava znachodzicca ŭ raspracoŭcy, dziejnaść domu miłasernaści ŭ Alaksandraŭcy nie spyniajecca, a Alaksiej Ščadroŭ kaža, što budzie sprabavać aficyjna zarehistravać dabračynnuju arhanizacyju.
«Nas padtrymlivajuć ludzi, padtrymlivaje i Kaścioł. Nuncyj Hudžeroci ciopła vykazvaŭsia pra dom miłasernaści ŭ Alaksandraŭcy. Jość čałaviek, jaki ŭziaŭsia dapamahčy sa zboram dakumientaŭ i pracedurami, bo ja daloki ad usiaho hetaha. Mnie praściej padabrać abiazdolenaha, abmyć jaho, nakarmić. Treba dapamahać takim ludziam, bo dziaržava imi nie zajmajecca».
Vykanaŭca abaviazkaŭ staršyni adździeła pa spravach relihij i nacyjanalnaściaŭ Hrodzienskaha abłvykankama Uładzimir Skrabko admoviŭsia kamientavać situacyju vakoł doma miłasernaści ŭ Alaksandraŭcy. «Tolki rašeńnie suda kančatkova vyznačyć, čym nasamreč źjaŭlajecca hety prytułak. Da hetaha momantu rana niešta zajaŭlać», — paviedamiŭ jon.
U Śledčym kamitecie spravu Ščadrova taksama nie kamientujuć.
Kamientary