Kolkasny skład Uzbrojenych sił buduć skaračać. Ciapier jon składaje kala 100 tysiač čałaviek.
Alaksandr Łukašenka ličyć nieabchodnym praciahvać pracu pa aptymizacyi struktury i skaračeńni kolkasnaha składu Uzbrojenych sił Biełarusi. Pra heta jon zajaviŭ 20 žniŭnia ŭ Minsku na naradzie ab dalejšych kirunkach budaŭnictva i raźvićcia biełaruskaj armii.
Kiraŭnik dziaržavy nahadaŭ, što kolkasny skład Uzbrojenych sił u svoj čas dachodziŭ da 200 tys. čałaviek, zaraz pryblizna 100 tys.
«Nam siońnia takaja kolkaść nie patrebnaja, siońnia nie kolkaść važnaja dla Uzbrojenych sił, — skazaŭ Łukašenka. — Ale aptymizacyja pavinna iści ŭ tym rečyščy, u jakim jana išła dahetul».
Jon daručyŭ uradu detalova prapracavać pytańni finansavaha zabieśpiačeńnia patreb Uzbrojenych sił, uličvajučy realii siońniašniaha dnia. «Vajennyja pavinny razumieć, što my možam, a što nie», — skazaŭ Łukašenka. «Ale pry hetym jasna treba pamiatać: čužoha sałdata my i naš narod karmić nie pavinny», — dadaŭ biełaruski kiraŭnik.
Łukašenka ličyć nieabchodnym asablivuju ŭvahu nadać dadatkovamu metavamu finansavańniu pieršačarhovych mierapryjemstvaŭ pa avijacyi i srodkach supraćpavietranaj abarony.
«Analizujučy kanflikty apošniaha času i vojny, my vyznačylisia, što hałoŭnaje dla nas siońnia — heta SPA i avijacyja. Tamu, kali heta hałoŭnaje źviano našych Uzbrojenych sił, to pieršačarhovaja ŭvaha jamu», —padkreśliŭ kiraŭnik dziaržavy.
Jon zajaviŭ, što ŭ metach uzmacnieńnia prestyžu vajennaj słužby nieabchodna vyznačycca ź mierami pavyšeńnia sacyjalnaj abarony vajennasłužačych, asabliva małodšych aficeraŭ.
Kiraŭnik dziaržavy taksama adznačyŭ, što terminy dziaržaŭnaj prahramy ŭładkavańnia vajennych haradkoŭ, kali heta nieabchodna, treba praciahvać, prahramu nie zhortvać. «Nam hetaha „ščaścia“ — vajennych haradkoŭ i ŭsiaho, što tam jość — ad savieckich Uzbrojenych sił zastałasia dastatkova», — kanstatavaŭ Łukašenka. Jon ličyć, što hetyja abjekty treba pryvieści ŭ «naležny vyhlad abo pieradać tym (kali jany vajennym nie patrebny), chto budzie zaŭtra efiektyŭna za ich adkazvać».
Kamientary