Kalinkina: «A jašče pasłu Surykavu varta było b škonku vydzielić»

Adzin čałaviek, jakoha škada va ŭsioj hetaj historyi z hiendyrektaram «Urałkalija» — maci Uładzisłava Baŭmhiertniera. Raptoŭny aryšt u dzikaj krainie całkam paśpiachovaha i ščaślivaha syna.

Niemaładaja žančyna imčycca ŭ Minsk, kab jaho terminova ŭbačyć, ale nie toje što ŭbačyć — nie moža pieradać u kamieru navat samyja prostyja rečy: majtki, škarpetki, švedar…

Jana błukaje pad ścienami biełaruskaha KDB, tamu što tak zdajecca, što skroź toŭstyja ścieny jaje chłopčyk usio ž adčuje rodnuju dušu. Jana z nadziejaj hladzić u abyjakavyja vokny viedamstva naščadkaŭ Dziaržynskaha, byccam za 85 apošnich hadoŭ u ich chto-niebudź bačyŭ što-niebudź dobraje.

Kolki raz heta było! Kolki biełaruskich maci nie mahli zrazumieć: za što? Kolki ich zadavalisia pytańniem: «Jak ža takoje moža być? Bo heta Jeŭropa, 21 stahodździe? Adkul takoje dzikunstva?»

Baŭmhiertniera mnie nie škada. I Kierymava dobra b u susiedniuju kamieru pasadzić. I Vałošyna. Tamu što jany vydatna viedali, z kim viaduć biznes. Bolš za toje, jany rvalisia siudy mienavita tamu, što ŭ Biełarusi mahčymy šachier-machier, niama zakonaŭ, hulnia idzie biez praviłaŭ. Padaryŭ prezidentu " Majbach « — i adrazu ŭsio dazvolena.

A jašče pasłu Rasii Surykavu varta było b škonku vydzielić. Razam z rasijskim MZS, deputatami Dziarždumy i mnohimi-mnohimi, chto ŭ Maskvie sa štanoŭ vyskokvaŭ, raschvalvajučy biełaruskija paradki.

Kolki razoŭ my ad ich čuli, što Biełaruś — pravavaja demakratyčnaja dziaržava, jakuju Zachad padviarhaje niespraviadlivym napadkam. Kolki razoŭ jany pierakonvali i śviet, i nas, i siabie, što ŭsio vydatna ŭ Biełarusi z pravami čałavieka. Što dobry u Biełarusi prezident i inšy nam nie patrebny.

Praktyčna ŭsie kandydaty ŭ prezidenty na apošnich vybarach byli aryštavanyja, ale Rasija pavinšavała Łukašenku z sumlennaj pieramohaj i stała ścianoj na jaho abaronu na mižnarodnaj arenie.

Advakataŭ da aryštavanych nie dapuskali, listy i pieradačy nie dazvalali — rasijski MZS kazaŭ pra nacyjanalnyja asablivaści demakratyi.

Kali ŭvieś cyvilizavany śviet patrabavaŭ vyzvaleńnia biełaruskich palitviaźniaŭ, Rasija paŭtarała: «Jość sud, usio budzie pa zakonie».

Što ž heta siońnia jany nie ŭspaminajuć pra spraviadlivy biełaruski sud, jaki niavinnych nie asudzić? Što ž ciapier prosta supraćlehłaje kažuć: «Siaredniaviečča, dzikunstva, vypuścicie nieadkładna…»

A kali kandydata ŭ prezidenty Uładzimira Niaklajeva źbili da nieprytomnaści jašče da zakryćcia vybarčych učastkaŭ; kali jaho vyciahnuli na koŭdrach prosta z balničnaj pałaty i zavałakli ŭ SIZA, heta nie było dzikaściu i Siaredniavieččam? .

Doŭha ŭžo kiruje Łukašenki z rasijskaj dapamohaj i prykładaŭ možna pryvodzić šmat. Tamu budzie spraviadliva i pravilna, kab kožnaha, chto spadziavaŭsia abo spadziajecca złavić niešta ŭ biełaruskich kałamutnych vodach, damoviŭšysia asabista z Łukašenkam, spaścihaŭ los Baŭmhiertniera — kamiera ŭ «amierykancy».

Niezaležna ad taho, z Rasii hetyja partniory — advakaty-prychilniki, z ZŠA ci z Hvadełupy. Tamu što z dobrymi namierami sumlennaha biźniesu ŭ ciapierašnija biełaruskija ŭmovy nichto nie pojdzie.

Pryjazdžajcie! Welcome! Pierakanajciesia, što ŭ kamierach biednieńka, ale čyścieńka! I što pieršymi abjektami, jakija treba było ŭ nas pryvatyzavać, pierš čym budavać niejkija płany, źjaŭlajucca biełaruskija turmy.

Voś tolki maci škada… Jany pakutujuć adnolkava — i mamy miljarderaŭ, jakija śpiavali chvalebnyja ody ciapierašnim biełaruskim paradkam, i mamy žabrakoŭ studentaŭ, jakija nienavidziać hetyja paradki da adčajnaj nierazvažlivaści.

• 0
• 0
• 0
• 0
• 0
• 0
• 0
• 0