Z metaj realizacyi kalijnych uhnajeńniaŭ u Biełarusi stvorana jašče adna «BKK»

U Biełarusi stvarajecca novaja handlovaja kampanija, jakaja budzie ažyćciaŭlać prodaž kalijnych uhnajeńniaŭ — AAT «Biełaruskaja kalijnaja kampanija». Heta praduhledžana ŭkazam № 399 «Ab udaskanaleńni ekspartu kalijnych uhnajeńniaŭ», jaki Alaksandr Łukašenka padpisaŭ 5 vieraśnia, paviedamlaje BiełaPAN.

«Z metaj realizacyi kalijnych uhnajeńniaŭ praduhledžana rehistracyja novaj handlovaj kampanii z anałahičnym ZAT «Biełaruskaja kalijnaja kampanija» nazvaj, ale ŭ inšaj pravavoj formie — AAT «Biełaruskaja kalijnaja kampanija», — paviedamlaje pres-słužba prezidenta.

U suviazi z hetym znoŭ stvaranaj kampanii dadziena realizoŭvać vyklučnaje prava źniešniaha handlu (u častcy ekspartu) minieralnymi abo chimičnymi kalijnymi ŭhnajeńniami, zamacavanaje za dziaržavaj, a taksama raspaŭsiudzić na jaje dziejańnie
norm ukaza ad 25 žniŭnia 2005 hoda № 398 «Ab udaskanaleńni ekspartu kalijnych uhnajeńniaŭ» i inšych narmatyŭnych pravavych aktaŭ Respubliki Biełaruś, jakija rehulujuć dziejnaść ZAT «BKK».

«Takim čynam, na AAT „Biełaruskaja kalijnaja kampanija“ budzie
ŭskładziena kaardynacyja ŭsich ekspartnych pastavak biełaruskich kalijnych uhnajeńniaŭ.
Heta dazvolić zachavać za Respublikaj Biełaruś dobra viadomy na suśvietnym rynku brend, zekanomić čas i resursy dla arhanizacyi ŭłasnaha trejdara i ŭ poŭnaj miery skarystać napracoŭki ZAT „BKK“ u častcy naładžanych kantaktaŭ sa spažyŭcami i zbytavych kanałaŭ», — prakamientavała pres-słužba.

Asnovu kadraŭ składuć biełaruskija śpiecyjalisty ZAT «BKK». Hienieralny dyrektar stvaranaj struktury budzie, u paradku vyklučeńnia, sumiaščać hetuju pasadu z vykanańniem abaviazkaŭ hienieralnaha dyrektara ZAT «BKK».

Taksama 5 vieraśnia Łukašenka padpisaŭ ukaz № 400 «Ab ustanaŭleńni staŭki vyvaznoj mytnaj pošliny na kalijnyja ŭhnajeńni i ŭniasieńni dapaŭnieńniaŭ i źmianieńnia va ŭkazy prezidenta Respubliki Biełaruś ad 3 kastryčnika 2011 h. № 442 i ad 17 studzienia 2012 h. № 37».

Zhodna z hetym dakumientam, «dla zabieśpiačeńnia stabilnaj raboty AAT «Biełaruśkalij» praduhledžana ŭstanaŭleńnie z 1 vieraśnia da 31 śniežnia 2013 hoda nulavoj staŭki vyvaznoj mytnaj pošliny na kalijnyja ŭhnajeńni.

Akcyjaniernamu tavarystvu taksama pradastaŭlena adterminoŭka pa vypłacie ŭ biudžet razavaha płaciažu za prava karystańnia nietrami (Pietrykaŭskaje radovišča) da 31 śniežnia 2014 hoda.

• 0
• 0
• 0
• 0
• 0
• 0
• 0
• 0