Piać faktaŭ pra Arkadzija Dvarkoviča

Mienavita vice-premjer rasijskaha ŭrada Arkadzij Dvarkovič zajmajecca «kalijnym kanfliktam», što razhareŭsia miž «Urałkalijem» i «Biełaruśkalijem». Mienavita Dvarkoviča
zaprašali ŭ Minsk razam z Baŭmhiertnieram, jakoha ŭ Minsku zatrymajuć. Były daradca Miadźviedzieva-prezidenta, Dvarkovič-vice-premjer adkazvaje za adnosiny ź Biełaruśsiu.

Syn šachmatysta

Rasijskamu vice-premjeru Arkadziju Dvarkoviču ŭsiaho 41 hod. Siarod biełaruskich namieśnikaŭ prem'jer-ministra takich maładych niama. Najmaładziejšamu Anatolu Kalininu — 54.

Dvarkovič naradziŭsia ŭ Maskvie ŭ intelihientnaj siamji. Jahony baćka byŭ viadomym u śviecie šachmatnym arbitram. Uvachodziŭ u trenierskija kamandy čempijonaŭ śvietu Hary Kasparava i Anatola Karpava.

Arkadzij u volny čas taksama biare aktyŭny ŭdzieł u
šachmatnym žyćci. Mienavita Dvarkovič łabiravaŭ praciah paŭnamoctvaŭ Kirsana Ilumžynava na čale FIDE. Eks-čempijon śvietu Anatol Karpaŭ ža abvinavaciŭ Dvarkoviča ŭ rejdarskim zachopie Rasijski šachmatnaj fiederacyi.

Brat pradprymalnika
Michaił Dvarkovič — pradprymalnik. Michaił niekali publična spračaŭsia z Navalnym, vyklikaŭ taho na duel. Dvarkovič nazvaŭ Navalnaha paklopnikam i paabiacaŭ nadrukavać kampramat na jaho.

Amierykanskaja adukacyja

Dvarkovič atrymaŭ dobruju adukacyju. Spačatku skončyŭ ekanamičny fakultet Maskoŭskaha dziaržaŭnaha ŭniviersiteta, a paśla Univiersitet Djuka (Paŭnočnaja Karalina, ZŠA) z
dypłomam mahistra ekanomiki. Dypłom Dvarkoviča paćvierdžany i sumnievaŭ nie vyklikaje. Znoŭku ž, u biełaruskim uradzie ludziej z zachodniaj adukacyjaj niama.

Z 1994 hoda Dvarkovič pracavaŭ pry Ministerstvie finansaŭ. U 2000 jon pieravodzicca pracavać u Ministerstva ekanomiki. Byŭ daradcam Hiermana Hrefa. Praŭda, pra Dvarkoviča kazali, što jon bolš tearetyk i navykaŭ u realnaj ekanomicy amal
nie maje.

Pravaja ruka Miadźviedzieva

Ad 2008 hoda Arkadzij Dvarkovič — daradca prezidenta Dźmitryja Miadźviedzieva. Ci «pravaja ruka», jak jaho niaredka nazyvajuć. Libierał Dvarkovič časta stanovicca «havoračaj» hałavoj dla pradstaŭnikoŭ Zachada. Braŭ udzieł u pieradačy viadomaha žurnalista Łary Kinha na Si-En-En.

Kali Dvarkoviča pryznačyli na pasadu vice-premjera, jon staŭ adkazvać za klučavyja haliny rasijskaj ekanomiki: TEK, ahrarny kompleks, pramysłovaść. Jak dobryja jakaści Dvarkoviča adznačajuć pierakanaŭčaść i chutkaść.

Kali stała viadoma, što Miadźviedzieŭ nie budzie bałatavacca na druhi termin, a pojdzie Pucin, Dvarkovič napisaŭ u svaim Tvitary: «Da už, niama povadaŭ dla radaści». Adnak takaja ščyraść miesca va ŭradzie jamu pakul nie kaštavała.

Žonka pracuje na Kierymava

U 2001 hodzie Dvarkovič pabraŭsia z pryhažuniaj Zumrud Rustamavaj. Ich nazyvajuć «samaj pryhožaj paraj rasijskaha Biełaha doma». Maładaja Zumrud była namieśnicaj ministra
majomasnych adnosin RF.

Ciapier ža jana syšła ŭ biznes. Rustamava zarablaje ŭ šmat razoŭ bolej za muža. Varta zaŭvažyć, što pracuje jana ŭ tych pradpryjemstvach, dzie vialikaj častkaj aktyvaŭ vałodaje
aliharch Sulejman Kierymaŭ («Polus Zołata», AAT PIK). Faktyčna, Kierymaŭ — hałoŭny pracadaŭca žonki Dvarkoviča.

Niaredka možna pačuć abvinavačańni ŭ bok Dvarkoviča, što ŭ siamji hałoŭnaj jakraz i źjaŭlajecca žonka. I što sam Dvarkovič łabiruje intaresy dahiestanskich biznesmenaŭ.

• 0
• 0
• 0
• 0
• 0
• 0
• 0
• 0