Enerhietyka lozunhaŭ

Bipalarnaja schiema – palityčnaja apazycyja suprać režymu – zanadta sproščanaja. Kastryčnickaja płošča pakazała: paŭstaje hramadzianskaja supolnaść.

Žychar namiotavaha lahieru Staś Pačobut zaznačyŭ: tam sabralisia nie partyjcy, nie aktyvisty, a «realnyja eŭrapiejskija ludzi».

Milinkievič, adčuvajučy, jak dynamična farmujecca słoj śviadomych hramadzianaŭ, abvieściŭ pra stvareńnie šyrokaha ruchu za pieramieny. Patrebna bahata kreatyvu, kab praz peŭny čas nie paboleła hrudkom na mohiłkach «šyrokich ruchaŭ».

A najpierš musiać narešcie vyśvietlić stasunki dvoje eks-kandydataŭ. Što dzialić – imaviernyja miescy na narach? Padabienstva da dźviuchhałovaha drakona nie dadaje apazycyi valanteraŭ. Asabliva biantežać namiery kamandaŭ paasobku rychtavacca da 26 krasavika. Čarnobylski šlach – pieratvarać u rostań?

Abjadnanaj ža apazycyi było b niedarečy zaraz revizavać persanalny vybar letašniaha Kanhresu («maŭr zrabiŭ svaju spravu»). Što karyści tasavać kałodu? Dyj Zachad u vypadku kadravaj ratacyi apyniecca ŭ durnavatym stanoviščy.

Sam Milinkievič abiacaje, što kaalicyja nie raspadziecca. Kaža: heta mocny arešak. Važna, adnak, kab apazycyjnyja siły mieli nia prosta supolny biurakratyčny orhan, a bajazdolnuju kanfihuracyju.

Nakont džentlmenstva kiroŭnych viarchoŭ iluzijaŭ niama. Ź inšaha boku, jany musiać ličycca z mocaju vonkavaha cisku dy supracivam «čałaviečaha materyjału» ŭ samoj krainie. Na naradzie ŭ aŭtorak Łukašenka zaznačyŭ, što ludzi i ŭłada musiać stać partnerami – i hety eŭfemizm symptamatyčny.

Minułaja kampanija zaśviedčyła, što ŭ apazycyjnych štabach brakavała kreatyvu, impravizacyi, vałodańnia sučasnymi palittechnalohijami. Pijaram musiać zajmacca dobryja admysłoŭcy, i nia tolki padčas kampanijaŭ. Na starym kamsamolskim dośviedzie tut nia vyjedzieš.

Milinkievičava kamanda nabiare maralnaje vahi, kali strymaje abiacańnie kankretna dapamahčy ŭsim represavanym. Vandroŭki lideraŭ pa hłybincy taksama vartyja stać nie kampaniejščynaj, a zaviadzionkaj. Słušny i namier stvaryć mocnuju systemu alternatyŭnaha infarmavańnia.

U dni Płoščy, na tle apateozu aficyjnaje chłuśni, hramada asabliva prahna prypadała da niezaležnych krynicaŭ. Palityčnaja apazycyja budzie dalnabačnaj, kali admovicca ad zvyčki siabravać z volnaj presaj ad kampanii da kampanii. Varta ŭvieś čas dbać pra jaje perspektyvy, vykarystoŭvajučy i svaje suviazi ŭ Eŭropie.

Jadro «realnych eŭrapiejskich ludziej» u dobraj arhanizacyjnaj škarłupinie sapraŭdy stanovicca mocnym areškam.

Partyjnaj ža kaalicyi, nie pretendujučy na rolu «našaha styrnavoha», varta znajści mocnyja lozunhi, kab ich enerhietyka davała kumulatyŭny efekt u vyrašalnyja peryjady.

• 0
• 0
• 0
• 0
• 0
• 0
• 0
• 0