Viartańnie ciapła ŭ kvatery Minska moža zaciahnucca da viečara. Haradžanie apisvajuć maštab avaryi
Vadochryšča ŭ 2026 hodzie minčuki zapomniać nadoŭha: tradycyjnyja studzieńskija marazy supali z maštabnaj kamunalnaj avaryjaj. Ranicaj 19 studzienia žychary adrazu piaci rajonaŭ stalicy — Frunzienskaha, Maskoŭskaha, Centralnaha, Savieckaha i Kastryčnickaha — vyjavili, što ich batarei astyli, a z kranaŭ źnikła haračaja vada. I kali pieršapačatkova prablemu abiacali vyrašyć da abiedu, to bližej da siaredziny dnia aptymizmu ŭ kamunalnikaŭ pamienieła.
Ad abiedu da viečara: jak mianialisia abiacańni
Pieršyja paviedamleńni pra zboj pačali źjaŭlacca ranicaj. Na partale 115.bieł pryčynaj adklučeńnia było paznačana «spynieńnie abstalavańnia CEC-4», a płanavym časam adnaŭleńnia pasłuh značyŭsia pramiežak 12:00—12:30. Heta davała nadzieju, što kvatery nie paśpiejuć vystudzicca.
Adnak pa stanie na 13:00 situacyja źmianiłasia. Ciapier słužba 115 paviedamlaje, što viaducca raboty pa «adnaŭleńni hidraŭličnych paramietraŭ paśla zboju pracy na CEC-4», a terminy viartańnia ciapła i haračaj vady ssunulisia na viečar.
Novy płanavy termin: da 18:00 19 studzienia. U hrafie «Faktyčny termin» pakul staić šmatkropje, što moža aznačać, što vyrašeńnie prablemy moža zaciahnucca i da bolš poźniaha času.
Raniej paviedamlałasia pra paškodžańnie ciepłamahistrali i abmiežavańnie ruchu transpartu pa vulicy Akademika Karskaha, dzie byŭ husty tuman ad pary. Vidavočcy publikujuć taksama videa z susiedniaj Školnaj vulicy, jakaja zaciahnutaja hustym tumanam ad kipieniu.
Dzie ŭžo mierznuć?
Pakul avaryjnyja bryhady zmahajucca z nastupstvami praryvu, sacyjalnyja sietki pieratvarylisia ŭ hałoŭnuju placoŭku dla abmienu infarmacyjaj. Karystalniki z roznych kutkoŭ horada pravodziać pierakličku, paćviardžajučy maštab zdareńnia. Najbolš paviedamleńniaŭ prychodzić z bujnych spalnych rajonaŭ — Sucharava, Malinaŭki, Kuncaŭščyny i Kamiennaj Horki.
«U Sucharavie ŭsio chałodnaje, ničoha nie zdymajem».
«Malinaŭka, niama aciapleńnia».
«Lebiadziny, taksama biez haračaj vady i aciapleńnia».
«U nas u domie prablemy z aciapleńniem jašče ź piatnicy pačalisia, u kvaterach +15 było… A ŭnačy padobna pačalisia prykoły, da ranicy damavy čat užo razryvała».
Hałoŭnaje pytańnie: navošta adklučać vadu letam?
Samaj papularnaj temaj dla abureńnia stała metazhodnaść štohadovych prafiłaktyčnych rabot. Ludzi nie razumiejuć, čamu jany vymušany ciarpieć dva tydni biez haračaj vady letam, kali heta nie harantuje bieśpierabojnaj pracy sistemy ŭzimku, pryčym mienavita ŭ samyja mocnyja marazy.
«Biednyja ludzi. Heta jašče raz da pytańnia, što ž jany testujuć letam pry adklučeńni vady».
«Hrošy na płanavyja pravierki letam, kali vadu adklučajuć, skrali naŭmysna. A takija voś avaryi potym viadoma ž vypadkovyja».
«Heta ž kab nie było ŭzimku avaryj, letam na dva tydni adklučajuć vadu, pravilna? Ničoha nie pierabłytaŭ?».
Ciarpieć ci patrabavać?
U kamientarach razharełasia sapraŭdnaja batalija pamiž dźviuma hrupami karystalnikaŭ. Adny zaklikajuć nie dramatyzavać situacyju, nahadvajučy pra ciažkija ŭmovy ŭ inšych krainach ci ŭ minułym, a inšyja nastojvajuć na tym, što ŭ XXI stahodździ spažyviec maje prava na jakasnyja pasłuhi, za jakija jon płacić.
Prychilniki pazicyi «nie nyć», takija jak błohier Andrej JustFray, pišuć pra «ciapličnyja ŭmovy» biełarusaŭ i fors-mažor:
«U Minsku, viadoma, vielmi ciapličnyja sacyjalnyja ŭmovy stvaryli. Kali doŭha žyvieš u Hruzii, dzie praź dzień moža i śviatło, i vada źnikać raptoŭna… Minus 15 — nu jakaja heta zima, nu adklučyli aciapleńnie, soniejka, ramantujuć, usich padrabiazna apaviaścili».
«Ludzi, vam nie śpiecyjalna i nie nazło adklučyli jaho! Chopić užo nyć! Paviercie, słužby taksama chočuć chutčej usio papravić».
Ich apanienty paryrujuć tym, što paraŭnoŭvać treba ź lepšym, a nie z horšym:
«A nam usio roŭna, što tam u Hruzii. Navošta paraŭnoŭvać tam, dzie horš? U Isłandyi, naprykład, usia sistema aciapleńnia i vodazabieśpiačeńnia pradublavanaja».
«Ja, na žal, vymušana ciarpieć, tamu što alternatyvy niama. Ale pry hetym mahu i budu vykazvać svaju niezadavolenaść niezdavalniajučaj jakaściu pasłuhi».
Padziaka rabočym i vadochryščanski humar
Niahledziačy na sprečki i choład, mnohija minčuki zachoŭvajuć adekvatnaść i pačućcio humaru. Ludzi razumiejuć, što pakul jany pišuć kamientary ŭ ciopłych koftach, avaryjnyja bryhady pracujuć na marozie, sprabujučy viarnuć ciapło ŭ horad. Davoli časta hučać padziaki prostym rabočym:
«Pa-sapraŭdnamu važnyja inžyniery, ślesary i rabočyja, jakija vychodziać na pracu ŭ hetuju maroznuju noč… Dziakuj vam, ludziam zvyčajnych, ale vielmi važnych prafiesij».
«Enierhietyki małajcy. Tak, parvała. Byvaje, što zrobiš. A voś chutka ŭsio reanimavać — heta zdymaju šapku».
Nu i viadoma, situacyja nie abyšłasia bieź ironii. Minčuki žartujuć, što kamunalniki zanadta litaralna ŭspryniali tradycyi Vadochryšča i vyrašyli zładzić kupańnie prosta ŭ kvaterach:
«CEC-4 Minsk vyrašyła ŭsim zładzić vadochryščanskaje kupańnie)))».
«A ja cełuju noč śniła, što niedzie vada pieralivajecca, a heta ŭ batarejach žurčała. Čas palić piečki».
«Vy razbłakavali ŭspaminy ź dziacinstva… Ci pačali biełarusy hreć cehłu?».
Zastajecca spadziavacca, što prahnozy na 18:00 apraŭdajucca, i viečar śviatočnaha dnia žychary paciarpiełych rajonaŭ sustrenuć u ciaple.
«Naša Niva» — bastyjon biełaruščyny
PADTRYMAĆCiapier čytajuć
Minharvykankam pra vuličnaje aśviatleńnie: Heta była razavaja akcyja. Siońnia ŭklučać a 18-j13
Kamientary
Jabaťki tolki siadziać na pasadzie za hroši. A tuta niešta rukami zrabić .