Premiju «Anhiełus»-2013 atrymała ŭkrainskaja piśmieńnica Aksana Zabužka

Ukrainskaja piśmieńnica, paetka i eseistka Aksana Zabužka atrymała Litaraturnuju premiju Siaredniaj Eŭropy «Anhiełus», jakaja vydajecca za najlepšuju knihu siarednieeŭrapiejskich piśmieńnikaŭ, vydadzienych pa polsku ŭ aryhinale ci ŭ pierakładzie.

Premija była prysudžanaja za raman «Muzej pakinutych sakretaŭ» i ŭručanaja ŭ subotu ŭviečary na ŭračystaści va ŭrocłaŭskim muzyčnym teatry Capitol, paviedamlaje radyjo «Svaboda».

Staršynia žury Natalla Harbanieŭskaja padkreśliła, što ŭhanaravanaja sioleta kniha — niezvyčajny raman. «U ramanie Aksany Zabužki pieraplatajucca i ŭzajemna pryciahvajucca historyja i siońniašni dzień, rečaisnaść i fantazija, kachańnie, zdrada i śmierć», — skazała Harbanieŭskaja padčas uznaharodžańnia.

«Zabužka biare nas u padarožža ŭ časie i prastory — ad Uschodu Ŭkrainy da Haličyny, ad mižvajennaj epochi da sučasnaści. Kijeŭskaja žurnalistka, antykvar ź Lvovu, žaŭnier UPA — persanažy, jakija viaduć nas pa zakutkach nacyjanalnaj pamiaci, kalektyŭnaj i indyvidualnaj», — pradstaŭlajuć knihu arhanizatary «Anhiełusa».

Sama Zabužka padkreśliła, što joj było važna pakazać u ramanie, što rečaisnaść — reč nievidavočnaja. «Ja chacieła źviarnuć uvahu na šmatvymiernaść śvietu. Heta taksama kniha pra siłu i ŭłady stereatypu, jak u našym žyćci, tak i ŭ historyi», — skazała jana.

Na pytańnie, ci rola sučasnaj ukrainskaj litaratury palahaje ŭ apaviadańni pra ciažkuju historyju hetaj krainy, piśmieńnica adkazała, što tolki jaje pakaleńnie piśmieńnikaŭ pačało surjozna zajmacca historyjaj krainy: «Ukraina — heta kraina, jakaja jašče tolki vučycca havaryć pra siabie, paznavać siabie. Na ščaście, ja naradziłasia ŭ niaščasnaj krainie, a niaščasnaja kraina daje piśmieńniku šmat materyjału dla pracy».

U finał premii vyjšli siem knih. Aprača knihi-laŭreatki, siarod ich apynulisia polskija ramany: «Dom pad Lutniaj» Kazimieža Arłosia, «Dziońnik» Ježy Pilcha, «Hrochaŭ» Andžeja Stasiuka i «Marfina» Ščepana Tvardocha. Ich supiernikami ŭ finale byli knihi «U huščy metrapolii» aŭstryjca Karła-Markusa Haŭsa i «Čas noč» rasiejskaj piśmieńnicy Ludmiły Pietrušeŭskaj.

Litaraturnaja premija Siaredniaj Eŭropy «Anhiełus» prysudžajecca za najlepšuju knihu, apublikavanuju na polskaj movie za papiaredni hod. Vydaŭcy mohuć naminavać na jaje atrymańnie žyvych aŭtaraŭ z 21 krainy Siaredniaj i Ŭschodniaj Eŭropy. Premija ŭjaŭlaje saboju statuetku anioła i ček na 150 tys. złotych (kala 50 tys. dalaraŭ).

Aprača aŭtara premiju pamieram 20 tys. złotych (kala 6,5 tys. dalaraŭ) atrymlivaje i pierakładčyk, sioleta — Katažyna Katyńska.

Aksana Zabužka — doktar filazofii. Mižnarodnuju słavu joj prynios raman «Palavyja dośledy ŭkrainskaha seksu», vydadzieny ŭ 1996 hodzie.

Letaś laŭreatam «Anhiełusa» staŭ charvacki piśmieńnik Milenka Jerhavič, pazaletaś — biełaruska Śviatłana Aleksijevič. Sioleta premija prysudžałasia vośmy raz.

• 0
• 0
• 0
• 0
• 0
• 0
• 0
• 0