U Minsku adbylisia masavyja zatrymańni vydaŭcoŭ i kniharaspaŭsiudnikaŭ
Pa infarmacyi «Našaj Nivy», siłaviki ŭ aŭtorak-sieradu 17—18 lutaha pryjšli da intelihiencyi.
Pieratrusy i zatrymańni byli nie adzinkavymi i nie vypadkovymi, a sistemnymi, spłanavanymi. U niekatorych siemjach zatrymali pa niekalki čałaviek. Pry pieratrusach va ŭsich prysutnych u kvaterach i ofisach praviarali telefony.
Prychodzili jak da supracoŭnikaŭ dziejnych, tak i da raniej zakrytych vydaviectvaŭ; jak da kiraŭnikoŭ vydaviectvaŭ, tak i da zvyčajnych supracoŭnikaŭ. A taksama da pradprymalnikaŭ, jakija zajmajucca raspaŭsiudam knižnaj pradukcyi. Usie zatrymanyja majuć vialikija zasłuhi pierad biełaruskaj kulturaj.
Što kankretna šukali, pakul niezrazumieła. Najbližejšyja niekalki tydniaŭ pakažuć, ci heta była prosta akcyja zastrašvańnia — i tady pieraśled abmiažujecca administratyŭnymi aryštami, — ci siłaviki majuć namier zavieści kryminalnyja spravy.
Raniej, u minułyja miesiacy, aryšty prajšli ŭ niekalkich inšych asiarodkach roznaha typu ŭ stalicy i rehijonach. Miarkujučy z toj infarmacyi, jakaja dachodzić, tam šukali dokazy finansavańnia z fondaŭ salidarnaści abo suviazi ź biełarusami zamiežža.
Vydaviectva «Technałohija» prypyniła pracu. Paviedamleńnie pra heta źjavilisia ŭ jaho fejsbuku. «Z peŭnych pryčyn vydaviectva «Technałohija» nie pracuje», — havorycca ŭ akaŭncie. Bolš nijakich tłumačeńniaŭ u dopisie niama.
10 lutaha paśla imklivaj chvaroby pamior 44‑hadovy knihavydaviec i knihanoša Raman Cymbieraŭ — adzin z apošnich na hetym poli.
Za piać dzion da taho jamu raptoŭna stała kiepska, źjavilisia prablemy z nyrkami. Paśla zdaryŭsia insult. Jaho pieraviali ŭ reanimacyju, ale nie ŭratavali. Jahonaja śmierć vyklikała ŭ sacyjalnych sietkach łavinu spačuvańnia i vykazvańniaŭ lubovi i pavahi da zroblenaha im.
Masavyja represii ŭ Biełarusi praciahvajucca z 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Heta vyklikała masavyja narodnyja pratesty, u jakich udzielničali miljony ludziej. U adkaz na heta ŭłady raspačali palityčnyja represii. Sotni tysiač biełarusaŭ byli vymušanyja pakinuć krainu, jašče sotni tysiač trapili ŭ roznaha typu «čornyja śpisy» na zvalnieńnie ci abmiežavańnie pravoŭ. Kala 150 tysiač stali achviarami kryminalnaha i administracyjnaha pieraśledu. Asabliva ciažki ŭdar byŭ naniesieny pa śfiery kultury.
«Naša Niva» — bastyjon biełaruščyny
PADTRYMAĆCiapier čytajuć
Što ŭ realnaści adbyłosia pad Smalavičami? Voś samaja łahičnaja pryčyna nalotu ašalełych rasijskich małaletak2
Kamientary