Pracedury pierapłaniroŭki žylla ŭ Biełarusi buduć sproščanyja

Rašeńnie ab nieabchodnaści ich pierahladu było pryniataje ŭčora na kalehii Administracyi prezidenta Biełarusi, jakaja prajšła z udziełam usich zacikaŭlenych bakoŭ.

Kiraŭnik Administracyi prezidenta Andrej Kabiakoŭ źviarnuŭ uvahu prysutnych na vialikuju kolkaść skarhaŭ hramadzian z nahody składanych pracedur uzhadnieńnia pierapłaniroŭki žyłych pamiaškańniaŭ. Jon nahadaŭ, što ŭ mai 2013 Saviet Ministraŭ pryniaŭ pastanovu №384, jakoj byŭ kankretyzavany pieralik rabot, što adnosiacca da pierabudovy i pierapłaniroŭki. Takija pracy patrabujuć raspracoŭki prajektnaj dakumientacyi i atrymańnia ŭzhadnieńnia ŭ miascovych vykanaŭčych orhanach. Dakumient sabraŭ razam usie patrabavańni što da pytańniaŭ pierapłaniroŭki, adnak u toj ža čas paciahnuŭ ceły šerah prablemnych momantaŭ.

Jak zaznačyŭ namieśnik kiraŭnika Administracyi prezidenta Valeryj Mickievič, zamiest spraščeńnia i pavyšeńnia prazrystaści hetych pracedur maje miesca ich uskładnieńnie: uvodziacca novyja dziejańni, uzhadnieńni, pašyrajecca koła rabot, jakija patrabujuć dazvołu vykankama i raspracoŭki prajektnaj dakumientacyi.

«Ludzi ŭvieś čas skardziacca, što ŭzhadnieńnie pierabudovy i pierapłaniroŭki šmatetapnaje i zabłytanaje.

Dachodzić da taho, što ŭ kožnym rajonie Minska moža dziejničać svoj asablivy paradak uzhadnieńnia. U vyniku dla atrymańnia nieabchodnaha ŭzhadnieńnia navat pa elemientarnych rabotach možna chadzić pa roznych instancyjach ledź nie paŭhoda», — skazaŭ Valeryj Mickievič.

Jon padkreśliŭ, što pieravažnaja bolšaść prajektnych arhanizacyj admaŭlajecca bracca za raspracoŭku prajektnaj dakumientacyi dla drobnych kvaternych rabot. Na jaho dumku, takaja situacyja stvaraje spryjalnuju hlebu dla pasiarednikaŭ, jakija nažyvajucca na raspracoŭcy prajektaŭ i ich uzhadnieńni, a takim čynam, i dla ŭźniknieńnia karupcyjnych prajavaŭ.

Andrej Kabiakoŭ ličyć, što musić być stvoranaja hranična prostaja i zrazumiełaja dla hramadzian sistema.

«Pavinnyja być standartnyja, vyraznyja patrabavańni da patrebnych rabot. Nie treba nijakich uzhadnieńniaŭ, ale kali paśla vykanańnia hetych rabot da ciabie ŭźniknuć pretenzii, vyśvietlicca, što ty zrabiŭ pierabudovu z parušeńniem patrabavańniaŭ, — adkazvaješ na poŭnuju katušku, — adznačyŭ kiraŭnik Administracyi. — Inakš my ŭsich ludziej u čerhi pastavim».

«Tak, jość tyja, chto ŭstaloŭvaje basiejny na apošnim paviersie, ale kab zmahacca ź imi, my prymušajem 95% dobraprystojnych hramadzian prachodzić hetyja pracedury», — dadaŭ Andrej Kabiakoŭ.

Jon taksama padkreśliŭ, što spraščeńnie pracedur nie pavinnaje tyčycca kapitalnych rabot i tych dziejańniaŭ, jakija parušajuć biaśpieku žyćcia hramadzian.

Ministr žyllova-kamunalnaj haspadarki Andrej Šorac pryznaŭ, što prablema isnuje, i adznačyŭ hatoŭnaść viedamstva pracavać nad aptymizacyjaj pracesaŭ.

U vyniku dyskusii prysutnyja pryjšli da vysnovy, što pastanovu nieabchodna dapracavać, pierahledzieć kolkaść pracedur i spraścić paradak ich ažyćciaŭleńnia. Na dapracoŭku pastanovy adviedziena dva miesiacy.

• 0
• 0
• 0
• 0
• 0
• 0
• 0
• 0