Vyznačanyja dziesiać bazavych pytańniaŭ dla «Narodnaha refierendumu»
Inicyjatary kampanii «Narodny refierendum» vyznačyli dziesiać bazavych pytańniaŭ dla svajoj inicyjatyvy.
Ź ich zaraz nieabchodna sfarmulavać piać vynikovych pytańniaŭ, jakija pradstaŭniki apazicyi majuć namier vynieści na ŭsienarodnaje hałasavańnie, paviedamiŭ staršynia Partyi BNF Alaksiej Janukievič 31 kastryčnika padčas anłajn-kanfierencyi na sajcie naviny.by.
Śpis, pavodle jaho słoŭ, składzieny pa vynikach pajezdak pradstaŭnikoŭ kampanii pa rehijonach, znosin z ekśpiertami, žurnalistami i prostymi ludźmi.
Pry adbory pytańniaŭ palityki kiravalisia šeraham kryteryjaŭ. «Pa-pieršaje, — rastłumačyŭ Janukievič, — pytańnie pavinna datyčycca ahulnanacyjanalnych prablem.
Pa-druhoje, stanoŭčy adkaz na kožnaje z pytańniaŭ pavinien byŭ vieści da sistemnych źmianieńniaŭ u krainie, zakranać prablemy, jakija nielha vyrašyć, nie źmianiajučy palityčnuju sistemu krainy. Pa-treciaje, pytańni nie pavinny dzialić biełaruskaje hramadstva. My starajemsia pracavać nad tymi temami, pa jakich u Biełarusi jość nacyjanalny kansensus».
Bazavyja pytańni, padrychtavanyja lidarami «Narodnaha refierendumu», sfarmulavanyja nastupnym čynam:
1. Ci zhodnyja vy z tym, što ŭ vypadku, kali dziaržava nie moža dać nieabchodnaje biaspłatnaje lačeńnie hramadzianinu da 18 hadoŭ, jana pavinna apłacić takoje lačeńnie ŭ lubym inšym miescy, dzie jaho praviaduć?
2. Ci zhodnyja vy, što kiraŭniki vykanaŭčaj ułady ŭsich uzroŭni pavinny abiracca pramym tajnym hałasavańniem i mieć paŭnamoctvy pa farmiravańni i rasparadžeńni biudžetam hetaj terytaryjalnaj adzinki?
3. Ci zhodnyja vy, što ŭrad Biełarusi pavinien zrabić usio nieabchodnaje, kab padpisać pahadnieńnie ź ES ab zonie svabodnaha handlu?
4. Ci zhodnyja vy, što nieabchodna ŭnieści ŭ Vybarčy kodeks pałažeńnie ab tym, što asoba, jakaja zajmała pasadu prezidenta dva terminy, nie moža być zarehistravanaja kandydatam u prezidenty?
5. Ci zhodnyja vy, što ŭrad pavinien pryniać nieabchodnyja miery dla stvareńnia admysłovych ilhotnych umoŭ viadzieńnia biźniesu dla biełarusaŭ, u tym liku pryniać zakon ab małym i siarednim biźniesie?
6. Ci zhodnyja vy, što nieabchodna zakanadaŭča zamacavać, što raschody jak na adukacyju, tak i na achovu zdaroŭja nie mohuć być mienšymi za 8% ad VUP?
7. Ci zhodnyja vy, što ŭ Biełarusi nie pavinna być zamiežnych vajennych baz?
8. Ci zhodnyja vy, što ŭsie prahramy i instytuty, jakija finansujucca biudžetnymi hrašyma, pavinny davać detalovuju i publičnuju spravazdaču pra dachody i raschody, akramia vypadkaŭ, jakija achoŭvajucca zakanadaŭstvam pra vajennuju i dziaržaŭnuju tajnu?
9. Ci zhodnyja vy, što rašeńni, jakija karennym čynam upłyvajuć na los i budučyniu krainy ci asobnaha rehijonu (u tym liku kitajski park i AES, vajennyja bazy), pavinny prymacca praz praviadzieńnie refierendumu adpaviednaha ŭzroŭniu?
10. Ci zhodnyja vy ŭnieści źmianieńni ŭ Vybarčy kodeks, kab kandydaty na vybarach luboha ŭzroŭniu mieli prava nakiroŭvać svaich pradstaŭnikoŭ u vybarčyja kamisii roznaha ŭzroŭniu adpaviednych akruh z pravam vyrašalnaha hołasu.
Jak adznačyŭ namieśnik staršyni kampanii «Havary praŭdu!» Andrej Dźmitryjeŭ, źmieny ŭ farmuloŭkach mohuć być značnymi. «Faktyčna ciapier my vyznačyli bazavyja temy, pra jakija havaryli ludzi», — rastłumačyŭ palityk.
Dla dalejšaha ŭdakładnieńnia farmulovak vynikovych pytańniaŭ płanujecca druhi tur pajezdak lidaraŭ «Narodnaha refierendumu» pa rehijonach, a taksama kansultacyi z «biełaruskimi fabrykami dumki», paviedamiŭ Dźmitryjeŭ.
«My kansultujemsia z BISS, fondam Ilva Sapiehi, źbirajemsia iści da Libieralnaha kłuba, razmaŭlajem z BIPART i indyvidualna — z ekśpiertami ad NDA. Bližejšym časam my nakirujem śpiecyjalnyja zvaroty da ŭsich biełaruskich fabrykaŭ dumki z prośbaj padkarektavać farmuloŭki našych pytańniaŭ ci prapanavać svaje», — raskazaŭ namieśnik kiraŭnika «Havary praŭdu!».
Dźmitryjeŭ zaklikaŭ nie kancentravacca na taktyčnych pytańniach arhanizacyi refierendumu: «My zrobim usio, kab bolšaść u Biełarusi ličyła nieabchodnym prajści hety refierendum jak praceduru. Kali čahości choča bolšaść u krainie, ułada abo heta vykonvaje, abo, kali admaŭlajecca, heta budzie kaštavać samoj uładzie».
Na dumku palityka, pravieści refierendum nieabchodna ŭ lubym vypadku, navat kali da ŭłady ŭ 2015 hodzie pryjdzie inšy čałaviek.
Nahadajem, kampanija «Narodny refierendum» inicyjavanaja rucham «Za Svabodu», hramadzianskaj inicyjatyvaj «Havary praŭdu!» i Partyjaj BNF u mai hetaha hoda. Paźniej da ich dałučyłasia Biełaruskaja sacyjał-demakratyčnaja partyja (Hramada) i arhkamitet Partyi svabody i prahresu.
Kamientary